Tumhara naam leti hon
To saanson main mohabbat ki
Kai perten ulat’ti hain
Tumhen aankhon main bharti hon
To aankhon se shua’en noor ki
Bahir nikalne ko tarsti hain
Tumhen sochon ki mutthi main jakarti hon
To saare jism main thandi hawaen chalne lagti hain
Abhi wazeh nahi mujh per…
K main chahat ki kitni manzilen teh ker k
Is manzil pe pohanchi hon
Abhi wazeh nahi mujh per…
K meri soch aisi hai
Ya teri zaat main koi shabistaan sa ujala hai
Mager ik baat wazeh hai…
K teri zaat ki mojodgi
Mere liye jeene ka iklota sahara hai
Meri sochon ka mehver hai
Mere jeene ka hasil hai
Agar tujh ko meri sochon se minhaa ker diya jaaye
To!!!
Baqi kuch nahi bachta
