***Usi aek fard key wastey merey dil meiN dard hey kis leeye
meri zindagi ka mutaalba wohi aek fard hey kis leeye
tu jo shehr meiN hi muqeem hey to musafirat ki fiza hey kiuN
tera kaarwaaN jo nahi gaya to hawa meiN gard hey kis leeye
terey husn sey ye pata chala tujhey deikh ke ye kehabar hui
jahaN raasta hi nahi koi wahaN raah’naward hey kis leeye
jo likha hey merey naseeb meiN kaheiN tu ney parrh to nahi lia
tera haath sard hey kis leeye tera rang zard hey kis leeye
wo tarq-e-rabt ka ehad tha kaheiN tootney tu nahi laga
terey dil ke dard ko deikh kar merey dil meiN dard hey kis leeye
koi waasta jo nahi raha teri aaNkh meiN ye nami hey kiuN
merey gham ki aag ko deikh kar teri aah sard hey kis leeye
