"tadees-e-talab"...merii ek nazam

Arts & Culture Poetry ( Intikhaab & Sho'ra-e-Gupshup)
1

salaam dosto,

ummeed hai k aap sabhi Khawaateen o Hazraat ke mizaaj-e-giraamii ba_Khair hoNge.

**maiN, jaisa shaayad aap sabhii jaante hoN, nazam nahiiN kahtaa…sirf Ghazal hii kahtaa huuN magar nazam kii baRhtii huii maqbooliyat ko dekh kar dil paseej gayaa meraa aur sochaa kiuN na ham bhii tab’a aazmaaii kareN…zindagii meN kul milaa kar 3 adad nazmeN kahii haiN ab tak…yeh us laRii kii teesrii nazam hai aur shaayad yehii zindagii kii aaKhirii bhii ho.

to, ab vohii nazam aapkii baseeratoN ke liye pesh kar rahaa huuN…ummeed hai k burii nahiiN lagegii…shukria.**

faqat aHqar,

_______Hashmat

taqdees-e-talab

maiN jaantaa huuN tumhaarii nigaah kaa mafhoom
mirii Hayaat kaa partav hai jiskii jumbiish meN
mire sha’oor kii dai’reena aarzoo kaa gudaaz
hazaaroN saal se maKhfii hai jiskii larzish meN

sukoot-e-shab meN fazaaoN kii naGhmagii, tum ho!
dayaar-e-dil kee bahaaroN kee taazagee tum ho!
kalee kaa Husn, guloN kee shiguftagee tum ho!
Khumaar_baar nazaaroN kii dil_kashii, tum ho!
miree Hayaat-e-HazeeN sar-basar tumhaaree hai!
tumhaare dam se hee jalte haiN chaahatoN ke chiraaGh!

maiN jaantaa huuN tumhaarii Hasiin palkoN par
** chhalak rahe haiN phir aaNsoo miri moHabbat meN**
** samajh sako jo miree mushkileN to behtar hai**
** maiN zindagii ke kisii moR par magar ik baar**
** tumhare paas ba_har taur lauT aauuNgaa**
** tumhaare Husn kii ra’naaiyoN meN gum ho kar**
** maiN apnii rooH kii taskeen phir se kar luuNgaa**
** magar, yeh raaz tum pe 'ayaaN ho to behtar hai**
** tumhaarii aaNkh kaa motii hai waqt_saaz abhii**
** Tapak na jaaye kahiiN iztiraab-e-jaaN ho kar**
** mire Khuloos_o_moHabbat kaa vaasta tumko**
** jo ho sake to miraa intezaar kar lenaa!**

** maiN jaantaa huuN tumhaarii nigaah kaa mafhoom**

2

Re: "tadees-e-talab"...merii ek nazam

Awesome..... KKF kiya baat hay aapki...

3

Re: "tadees-e-talab"...merii ek nazam

Bohat khoob aor nazamien b likhni chiye
ar aap jaise acha likhne wale ko nazmain b likthte rehna chiaye :-)

4

Re: "tadees-e-talab"...merii ek nazam

Mujhey nazm hamesha sey is leeye ziaada pasand rahi hey ke ye gheir'zaroori funni masloN meiN uljhey bina, likhney waaley ko apney jazbaat aur ehsaasaat khul kar bayaan karney deti hey. Aap yaqeenan itni hi aasaani sey ghazal bhi keh letey hoN ge, lekin shaed dil sey aap ye bhi tasleem kareiN ke nazm kehna ghazal kehney sey be'had aasaan hey. Rahi baat maqbooliat ki, to us ki gawaahi to aap khud hi dey chukey heiN :)

Aek likhaari ke tor par aap ye feisla kar saktey heiN ke aap ke nazm doobara na nilkheiN, lekin aey qaari ke tor par meiN samajhta hooN ke ye feisla aap ki apni zaat ke saath aek barri na'insaafi ho gi.

Aek likhaari ke tor par aap ye daawa kar saktey heiN ke aap ghazal kehney meiN mahaarat rakhtey heiN, lekin aek qaari ke tor par mujhey ye arz karney ki ijaazat dijeeye ke meiN ney aaj tak aap ki koi ghazal is qadar khoobsoorat aur bharpoor nahi paai, jitni ke ye nazm hey.

5

Re: "tadees-e-talab"...merii ek nazam

KKF aap toh chupey rustam niklay. Mashallah

6

Re: "tadees-e-talab"...merii ek nazam

bohat khoob nazm hay, Kisi Filmi Director sey baat ki :-d Sahir k zamanay meiN aesey Geet bana kartay they , is nazm k andaaz-e-bayaaN meiN bhi kahin wuh Rang paaya jaata hay Jo Sahir Sahib k Shaairi meiN paaya jaata tha , aik Khoobsurat nazm paish karney par daad qabool kijiye, Umeed hay aap aur nazm bhi jald hi share kareiN ge :-)

7

Re: "tadees-e-talab"...merii ek nazam


shukria Fara Bhabhii aapkaa bahooot bahooooot...aapkii zarra navaazii hai :)


IS Bhaaii aapkaa beHad shukria k aane nazam pasand farmaayii :) iA, dekhiiye koshish karuuNgaa agar dil aamaadah huaa to...vaise, dil to mushkil kaamoN se apnaa daaman bachaataa hai :D


*inshaa Allah koshish karuuNgaa k kuchh safHe siyaah kar sakuuN :) shukria pasandeedgii ke liye :)
*


**shukria janaab e man...chhupaa hii rahna chaahtaa huN lol...

band muTThii laakh kii
khul jaaye to Khaak kii :)**


**shukria ji, shukria...aapne to mujhe podeene ke peR pe chaRhaa diyaa...lol...cheh piddi cheh piddi kaa shorbaa...kahaaN SaaHir saaHib aur kahaN maiN...

vo shahnshaah e aalam e shaa'irii
maiN gadaa e kocha e saaHirii ****:)

vaise, aapkii Hausalah afzaaii aur pazeeraaii ke liye maiN bahot mamnoon aur mutashakkir huN. :)**