Kis qadar habs hey shahr meiN jaan-e-jaaN
shaakh par koi bhi phool khilta nahiN
jis ko chahha wuhi shakhs milta nahiN
hey ajab qahet-saali ka aalam yahaN
aik lafz bhi lab sey nikalta nahiN
… Sheir hota nahiN…
barf sii jam gai hey yooN ehsaas par
koi hansta nahiN koi rota nahiN
merey munsif terey shahr meiN aaj bhi
aik ghar hey jahaaN koi sota nahiN
apni rag rag meiN jaan-e-jahaaN dard hey
iss qadar dard hey …zabt hota nahiN
kiya kaheiN dil-girifta terey… bin terey
kis qadar mushkiloN meiN griftar heiN
zindagi ke ye din kitney azaar heiN
Umr kaTti nahiN, jaaN nikalti nahiN
dil dharkta tou hey … saans chalti nahiN
iss liye sochtey heiN ke ab ke baras
teri dehleez par hum mareez-e-wafa
sar jhuka kar muhabbat ko sajda kareiN
aakhri baar bas rubaru hoN terey
tujhko ji bhar ke dekheiN…nazar meiN bhareiN
aur phir khaamshi sey bikhar jaaeiN hum
terey qadmoN meiN jaaN sey guzar jaaeiN hum
