@Asif971 yah haasya kavita parhein
**Tum shleel kaho, ashleel kaho
Chaho toh khulkar gaali do!
Tum bhale mujhe kavi mat maano
Mat waah-waah ki taali do!
Par mai to apne maalik se
Har baar yahi var maangunga –
Tum gori do ya kaali do!
Bhagwaan mujhe ik saali do!
Seedhi do, nakhron waali do
Saadharan ya ki niraali do,
Chahe babool ki tahni do
Chahe champe ki daali do!
Par mujhe janm dene waale
Yah maang nahi thukra dena –
Asli do, chahe jaali do
Bhagwaan mujhe ek saali do!
Wah yovan bhi kya yovan hain
Jisme mukh par laali na huin,
Alkein ghoongharwaali na huin,
Aakhein ras ki pyaali n huin!
Wah jeevan bhi kya jeevan hai
Jismen manusya jeeja n bana,
Wah jeeja bhi kya jeeja hai
Jiske chhoti saali n hui!
Tum kha lo bhale pleton main
Lekin thaali ki aur baat,
Tum raho fenkte bhare daanv
Lekin khaali ki aur baat!
Tum matke par matke pee lo
Lekin pyali ka aur maja,
Patni ko hardam rakho saath,
Lekin saali ki aur baat!
Patni keval ardhangin hai
Saali sarvangin hoti hai,
Patni to roti hi rahti
Saali bikherti moti hai!
Saala bhi gahre mai jaakar
askar patwaar fenk deta
saali jeeja ji ki naiya
kheti hai, nahin duboti hai!
Virhin patni ko saali hi
Pee ka sandesh sunaati hai,
Bhondu patni ko saali hi
Karna shikaar sikhlaati hai!
Dampatti main agar tanaav
Roos-America jaisa ho jaaye
To saali hi Nehru banker
Bhatkon ko raah dikhaati hai!
Saali hai paayal ki chham-chham
Saali hai cham-cham taara-si,
Saali hai bulbul-si chulbul,
Saali hai chanchal paara-si !
Yadi in upmaaon se bhi kuchh
Pahchaan nahi ho paae to,
Har rog door karne waali
Saali hai amratdhaara-si !
Mulla ko jaise dukh deti
Burke ki chourhi jaali hai,
Peene walon ko jyon akhri
Table ki botal khaali hai !
Chaau ko jaise chyang nahi
Sapne mai kabhi suhaata hai,
Aise mai khunsat logon ko
Yah kavita saali waali hai !
Saali toh ras ki pyaali hai
Saali kya hai rasgulla hai,
Saali to madhur malaai-si
Athwa rabdi ka kulla hai !
Patni to sakht chhuhaara hai
Hardam sikudi hi rahti hai
Saali hai faank santare ki
Jo kuchh hai khullamkhulla hai !
Saali chatni podeene ki
Baton ki chaat jagaati hai,
Saali hai Dilli ka laddu
Dekho to bhookh badhaati hai !
Saali hai Mathura ki khurchan
Ras main lipti hi aati hai,
Saali hai aalu ka paapad
Chhoote hi shor machaati hai !
Kuchh pata tumhen hai, Hitler ko
Kisliye agni ne chhaar kiya?
Ya kyon Britain ke logon ne
Apna priy King utaar diya?
Ye dono the saali-viheen
Isliye ladaai haar gae,
Wah mulk-e-adam sidhaar gaye
Ya saat samundar paar gaye!
Kisliye Vinoba gaanv-gaanv
Yun mare-maare firte the?
Do-do baj jaate the lekin
Nehru ke palak n girte the !
Ye dono the saali-viheen
Wah baba baal barha nikla,
Chacha bhi kalam ghisa karta
Apne ghar main baitha iklaa !
Mujhko hi dekho saali bin
Jeevan thaali-sa lagta hai,
Saalon ka jeeja ji kahna
Mujhko gaali sa lagta hai !
Yadi Prabhu ke param parakram se
Koi saali paa jaata main,
To bhalaa haasya-ras mein likhkar
Patni ko geet banata mai?
- Gopal Prasad Vyas
**
