Re: Poet of the Month SAGAR SIDDIQUI
GHAZAL
Agarche ham ja rahe hain mehfil se naala-e-dil figaar ban kar
Magar yaqeeN hai k lauT aayeN ge naghma-e-nau-bahaar ban kar
Ye kya qayaamat hai baagh-baano! k jin ki khaatir bahaar aaee
Wohi shagoofe khaTak rahe hain tumhari aankhoN mein khaar ban kar
Jahaan waale hamaare geetoN se jaaeza lein ge siskiyoN ka
Jahaan mein phail jaayeN ge ham bashar bashar ki pukaar ban kar
Bahaar ki bad-naseeb raatein bula rahi hain chale bhi aao
Kisi sitaare ka roop le kar kisi k dil ka qaraar ban kar
Zarurat-e-raah k mutaabiq musaafiroN ne bhi seekh li hai
Wo rahzani, muddatoN rahi hai jo rahbaroN ka sha'aar ban kar
Talaash-e-manzil k marhaloN mein ye haadisa ik ajeeb dekha
Fareib raahoN mein baiTh jaata hai soorat-e-aaitbaar ban kar
Ghuroor-e-hasti ne maar Daala wagarna ham log jee hi lete
Kisi ki aankhoN ka noor ho kar kisi k dil ka qaraar ban kar
Dayaar-e-peer-e-maghaaN mein aa kar ye ik haqiqat khuli hai Saghar
Khuda ki basti mein rehne waale to looT lete hain yaar ban kar