Re: Poet of the Month SAGAR SIDDIQUI
GHAZAL
Main iltefaat-e-yaar ka qaayal nahi hooN dost
Sone k narm taar ka qaayal nahi hooN dost
Mujh ko khizaaN ki eik luTi raat se hai pyar
Main raunaq-e-bahaar ka qaayal nahi hooN dost
Har shaam-e-vasl ho naee tamheed-e-aarzu
Itna bhi intazaar ka qaayal nahi hooN dost
Do chaar din ki baat nahi zindagi ki baat
Do chaar din k pyaar ka qaayal nahi hooN dost
Jis ki jhalak se maand ho ashkoN ki aabru
Us motiyoN k haar ka qaayal nahi hooN dost
Laaya hooN be-hisaab gunaahoN ki eik fard
Majboor hooN shumaar ka qaayal nahi hooN dost
Saghar ba-qadr-e-zarf luTaata hooN naqd-e-hosh
Saaqi se main udhaar ka qaayal nahi hooN dost