Re: "Poet Of The Month - - - Poet Of GS"
Sawaal-naama
Merey lab pe jo duwa hey
kya tujh ko kuch pata hey
ke wo kis ke waastey hey!
merey tasavvuroN meiN har su
jo ik gulaab khila huwa hey
usey kis ki aarzu hey!
terey aaNganoN meiN aa kar
jo chaandi ruki hey
usey kis ki justuju hey!
is koocha-e-dilbari meiN
ye jo itni roshni hey
wo kis ko dhooNdti hey!
meri bekhudi ko taktey
ye jo chaand haNs raha hey
to usey kya lag raha hey!
ke fasl-e-gul kaheeN nahi hey
fiza phir bhi mehak rahi hey
teri rahguzar meiN har su
jo chiraagh jal rahey heiN
unhey aag kis ney di hey!
Zara soch kar bataana
kya tujhey yuN nahi hey lagta
ke merey lab pe jo duwa hey
merey tasavvuroN meiN har su
jo gulaab khila huwa hey
wo terey waastey hey…!
By: Amal
bus baqikal aj kaliye itna hi:D