Kuch Ghazlain, Meri Diary Se..

Arts & Culture Poetry ( Intikhaab & Sho'ra-e-Gupshup)
1

Assalam-o-Alaikum,

Mujhe Acha Laga being_lonely Ka Iss Tarah Mashwara Dena, Apnaiat Ka Ehsas Bhi Hua Aur Buhat Khushi Bhi.. Jabhi Mainay Socha Ke Main 2 Threads Start Karon Yaani Ke Ghazal Aur Nazm Ke Leay Alehda Alehda..

Mujhe Umeed Hai Aap Logon Ko Meri Collection pasand Aye Gi..

Best Regards,
Ahmer - Red Identity

2

Hijr Ki Bud'dua Na Ho Jana..

Noshi Gillani Ki Aik Ghazal..

Hijr Ki Bud'dua Na Ho Jana
Daikh Lena Saza Na Ho Jana

Moar To Beshumar Ayen Ge
Thak Na Jana, Juda Na Ho Jana

Ishq Ki Intiha Nahin Hoti
Ishq Ki Intiha Na Ho Jana

Aakhir-e-Shab Udas Chand K Sath
Aik Bujhta Diya Na Ho Jana

Be Iradah Safar Pe Nikle Ho
Raston Ki Hawa Na Ho Jana

Zindagi Dard Se Ibarat Hai
Zindagi Se Khafa Na Ho Jana

Ek Tumhi Ko Khuda Se Manga Hai
Tum Kahin Be Wafa Na Ho Jana

Umeed Hai Aap Logon Ko Pasand Aye Gi..

Regards,

3

Re: Kuch Ghazlain, Meri Diary Se..

nice poem , thanks for sharing:-)

4

Re: Kuch Ghazlain, Meri Diary Se..

:)

Yun Dil Ko Har Ek Shakhs Pe Wara Nahi Kartey
Ankhon Main Har Ek Aks Utara Nahi Kertay

Honi Hai Tu Ik Bar Hi Ho Jaay Mohabbat
Yeh Bhool Hai Aisi Kay Dobara Nahi Kartey

Acha Howa Main Ne Hi Faqat Dekha Magar Yun
Mehfil Main Kissi Ko Bhi Ishara Nahi Kartey

Mil Jaay Sar-E-Rah Jou Bhichra Howa Koi
Chup Chap Hi Taktey Hain Pukara Nahi Kartey

Kiun Piyar Ki Bazi Se Huay Iss Darja Garezan
Kehtay Hain Ke Badal Har Ke Hara Nahi Kartey

Kajal Se Bhi Ab Kaam Koi Lay Na Saheli!
Yun Dard Se Ankhon Ko Sanwara Nahi Kartey..

Umeed Hai Aap Logon Ko Pasand Aye Gi..

Regards,

5

Re: Kuch Ghazlain, Meri Diary Se..

Aik Ghazal..

Wafa Ruswa Nahi Karna
Suno Aisa Nahi Karna

Main Paehle Hi Akela Hun
Mujhe Tanha Nahi Karna

Meri In Jheel Aakhon Ko
Kabhi Sehra Nahi Karna

Judai Bhi Jo Aajae
To Dil Chota Nahi Karna

Bharosa Bhi Zaruri Ha
Magar Sab Ka Nahi Karna

Muqadar Phir Muqadar Ha
Koi Dawa Nahi Karna

Meri Takmeel Tumse Ha
Mujhe Aadhhaa Nahi Karna

Jo Likha Ha Wohi Hoga
Kabhi Shikwa Nahi Karna!!

Umeed Hai Aap Logon Ko Pasand Aye Gi..

Regards,

6

Re: Kuch Ghazlain, Meri Diary Se..

Aik Ghazal, Jo Mujhe Buhat Pasand Hai..

Ye Zara Zara Si Baat Par Tarhan Tarhan Ke Azaab Kiun?
Jo Kisi Sey Bhi Khafa Na Ho Mujhey Us Khuda Ki Talaash Hey

Mujhey Laghzishon Pe Har Gharri Koi Tok’ta Hey Baar Baar
Jisey Kar Ke Dil Ko Dukh Na Ho Mujhey Us Gunaah Ki Talaash Hey

Mein Dhoondta Hoon Wo Khizaan Jisey Gulshanon Sey Pyaar Ho
Jisey Kisi Chiragh Sey Na Bey’r Ho Mujhey Us Hawa Ki Talaash Hey

Mujhey Us Nagar Ki Hey Justuju Jahan Koi Bhi Chahata Nahi Lahu
Jahan Hiran Ko Sheir Sey Dar Na Ho Mujhey Us Jaga Ki Talaash Hey

Yahan Ik Lamhey Ke Parrao Mein Merey Sarey Phool Jhulas Gaey
Ab Jahaan Talkhion Ki Tappish Na Ho Mujhey Us Fiza Ki Talaash Hey

Bina Humsafar Ke Kab Talak Koi Musafiton Mein Laga Rahey
Jahan Koi Kisi Sey Juda Na Ho Mujhey Us Raah Ki Talaash Hey

In Husn-Kadon Ke Shor Sey Meri Samaa’atein Hein Ajnabi
Ho Jis Pukaar Mein Mukhlisi Mujhey Us Sada Ki Talaash Hey

Mujhey Deikh Kar Jo Ik Nazar Merey Sarey Dard Samajh Sakey
Jo Is Qadar Ho Chaara-Gar Mujhey Us Nigaah Ki Talaash Hey

Umeed Hai Aap Logon Ko Bhi Pasand Aye Gi..

Regards,

7

Re: Kuch Ghazlain, Meri Diary Se..

ik baar nahi, baar baar pasand aayee.....esp the very fist one by NG. thanks for sharing smethng so nice :)

8

Re: Kuch Ghazlain, Meri Diary Se..

I loved this one, written by Amal:-)

9

Re: Kuch Ghazlain, Meri Diary Se..

Excellent , boht achi, boht khoob....:)

10

Re: Kuch Ghazlain, Meri Diary Se..

W.salam

Nehayat Shukriya Aap K In Khobsurat Alfaaz Aur Jazboon Ka ! Iss Mehfil Ki Nazar Aik Shair !Hope You Undstnd K Yeh Shair He Kion :)

bikhra para hai tere he ghar mein tera wajood
be-kar mehfilon mei tujhe dhondta hon mein

Jahan Rahiye Khush Rahiye Amin !

lOn3r sId

11

Re: Kuch Ghazlain, Meri Diary Se..

Apki Umeed Bilkul Bar Aai Hai Yeh Ghazal Mujhe Bohat Pasand Aai Hai :)

12

Re: Kuch Ghazlain, Meri Diary Se..

Thnx alot for such Khoon Barha Denay Walay Comments :)

13

Re: Kuch Ghazlain, Meri Diary Se..

Aik Buhat He Khoobsurat Ghazal,

Usay Apnay Farda Ki Fikr Thi , Wo Jo Mera Waqif-E-Haal Tha,
Wo Jo Us Ki Subh-e-Urooj Thi, Wohi Mera Waqt-Zawaal Tha.

Mera Dard Kesay Wo Janta, Meri Baat Kesay Wo Manta,
Wo To Khud Fana Kay Safar Main Tha, Usay Rokna Bhi Mahal Tha.

Kahan Jao Gay Mujhay Chhor Kay, Main Ye Pooch Pooch Kay Thak Gaya,
Wo Jawab Mujh Ko Na Day Saka, Wo To Khud Sarapa Sawal Tha.

Wo Jo Us Kay Samnay Aa Gaya, Wohi Roshni Main Naha Gaya,
Ajab Us Ki Haybat-Husn Thi, Ajab Us Ka Rang-Jamal Tha.

Dam-Wapsi Usay Kia Hua, Na Wo Roshni Na Wo Taazgi,
Wo Sitara Kesay Bikhar Gaya, Wo To Apni Misal Aap Tha.

Wo Mila To Sadyon Baad Bhi, Meray Lab Pay Koi Gila Na Tha,
Usay Mere Chup Nay Rula Dia , Jisay Guftugoo Main Kamal Tha.

Meray Sath Lag Kay Wo Ro Diya, Mujhay Fakhri Itna Wo Keh Saka,
Jisay Janta Tha Main Zindagi, Wo To Sirf Wehm-O-Khayal Tha!

Umeed Hai Aap Logon Ko Bhi Pasand Aye Gi..

Regards,

14

Re: Kuch Ghazlain, Meri Diary Se..

Aik Ghazal,

Tum Rooth Jao Mujh Se, Aisa Kabhi Na Kerna
Main EK Nazar Ko Tarsoon, Aisa Kabhi Na Kerna

Main Pooch Pooch Haruun, Sau Sau Sawal Ker Ke
Tum Kuch Jawab Na Do, Aisa Kabhi Na Kerna

Mujh Se He Mil Ke Hansna Mujh Se He Mil Ke Rona
Mujh Se Bichhar Ke Jee-lo Aisa Kabhi Na Kerna

Tum Chand Ban Ke Rehna, Main Dekhta Rahoonga
Kisi Roz Tum Na Niklo, Aisa Kabhi Na Kerna

Tum Chalay Jao Jab Bhi, Tou Dekhoon Tumhara Rasta
Tum Laut Ke Na Aao, Aisa Kabhi Na Kerna..

Umeed Hai Aap Logon Ko Pasand Aye Gi..

Regards,

15

Re: Kuch Ghazlain, Meri Diary Se..

u have pretty good collection :)

16

Re: Kuch Ghazlain, Meri Diary Se..

Very different but very beautiful :k: Wesey to saari collection hi la’jawaab hey, but I liked this one very much. Great selection redidentity :k: Thanx for sharing it with us :slight_smile:

17

Re: Kuch Ghazlain, Meri Diary Se..

Aik Ghazal,

Kartaa Hun Jam’aa Main To Bikhartii Hai Zaat Aur
Baaqii Hai Kitnii Ai Mere Maulaa, Ye Raat Aur !

Letii Hai Jaltii Sham’aa Bhii Bujhne Men Kuch To Vaqt
Hai Aadmii Saa Ko’ii Kahaan Be-Sabaat Aur

Sailaab Jaise Letaa Hai Diivaar Ke Qadam
Kartaa Hai Gham Bhii Dil Se Ko’ii Vaardaat Aur

Yun To Huzuur-E-Paak (Saw) Ke Laakhon Hain Madda’khvaan
Taa’ib Sii Likh Rahaa Hai Magar Kaun Na’at Aur

Mazhar, Az’l Ke Husn Ke “Amjad” Hain Be-Shumaar
Lekin Jo Dekhiye To Hai Baarish Kii Baat Aur

I Hope Ke Aap Logon Ko Pasand Aye Gi..

Regards,

PS: Thnx alot for everyone for appreciating my selections :$

Guppy Meet: LAHORE
18

Re: Kuch Ghazlain, Meri Diary Se..

Amjad Islam Amjad Meray Most Favourite Poet Hain.. Unhi Ki Aik Aur Ghazal..

Labon Pe Phool Khiltay Hain Kisi Ke Naam Se Pahle
Dilon Ke Deep Jalte Hain Charagh-E Shaam Se Pahle

Kabhi Manzar Badalne Par Bhi Qissa Chal Nahin Pata
Kahani Khatam Hoti Hai Kabhi Anjaam Se Pahle

Yahi Taare Tumhaari Aankh Ki Chilman Mein Rehte The
Yahi Sooraj Nikalta Thaa Tumhare Baam Se Pahle

Hui Hai Shaam Jungle Main Parinde Laut.Te Honge
Ab In Ko Kis Tarah Rokain Nawaah-E-Daam Se Pahle

Ya Saare Rang Murdaa The Tumhaari Shakl Banne Tak
Ya Saare Harf Muhmal The Tumhaare Naam Se Pahle

Huaa Hai Wo Agar Munsif Tou Amjad Ihtiyatan Ham
Sazaa Tasleem Karte Hain Kisi Ilzam Se Pahle

Umeed Hai Aap Logon Ko Pasand Aye Gi..

Regards,

19

Re: Kuch Ghazlain, Meri Diary Se..

Yet Another One From Amjad Islam Amjad,

Khvaab-Nagar Hai Aankhen Khole Dekh Rahaa Huun
Us Ko Apnii Jaanib Aate Dekh Rahaa Huun

Kis Kii Aahat Qarya Qarya Phail Rahii Hai
Diivaaron Ke Rang Badalte Dekh Rahaa Huun

Kaun Mire Jaaduu Se Bach Kar Jaa Saktaa Hai!
Aaiinaa Huun, Sab Ke Chehre Dekh Rahaa Huun

Darvaaze Par Tez Havaaon Kaa Pahraa Hai
Ghar Ke Andar Chup Ke Saaye Dekh Rahaa Huun

Jaise Meraa Chehraa Mere Dushman Kaa Ho
Aaiine Men Khud Ko Aise Dekh Rahaa Huun

Manzar Manzar Viiraanii Ne Jaal Taane Hain
Gulshan Gulshan Bikhre Patte Dekh Rahaa Huun

Manzil Manzil Hol Men Duubii Aavaazen Hain
Rastaa Rastaa Khauf Ke Pahre Dekh Rahaa Huun

Umeed Hai Aap Logon Ko Pasand Aye Gi..

Regards,

20

Re: Kuch Ghazlain, Meri Diary Se..

Ahmed Nadeem Qasmi Ki Aik Ghazal..

Vo Ko’ii Aur Na Thaa Chand Khushk Patte Thay
Shajar Se Tuut Ke Jo Fasl-E-Gul Pe Roye Thay

Abhii Abhii Tumhen Sochaa To Kuchh Na Yaad Aayaa
Abhii Abhii To Ham Ek-Duusre Se Bichhre Thay

Tumhaare Baad Chaman Par Jab Ek Nazar Daalii
Kalii Kalii Men Khizaan Ke Chiraag Jalte Thay

Tamaam Umr Vafaa Ke Gunaah-Gaar Rahe
Ye Aur Baat Ke Ham Aadmii To Acche Thay

Shab-E-Khaamosh Ko Tanhaa’ii Ne Zubaan De Dii
Pahaar Guunjte The Dasht San-Sanaate Thay

Vo Ek Baar Mare Jin Ko Thaa Hayaat Se Pyaar
Jo Zindagii Se Gurezaan, The Roz Marte Thay

Naye Khayaal Ab Aate Hain Dhal Ke Zehn Men
Hamaare Dil Men Kabhii Khet Lah-Lahaate Thay

Ye Irtiqaa Kaa Chalan Hai Ke Har Zamaane Men
Puraane Log Naye Aadmii Se Darte Thay

“Nadeem” Jo Bhii Mulaaqaat Thii Adhuurii Thii
Ke Ek Chehre Ke Piichhe Hazaar Chehre Thay

Umeed Hai Aap Logon Ko Pasand Aye Gi..

Regards,