From today onwards, I will be posting all my contributions [Ghazal/Nazm] to this thread and hope that you will enjoy reading them …
**Mods … let me know if this idea is against the forum policy ! **
So here is the first one …
Ab tu khwaab lagte hain
Zindagi ke woh Lamhay
Jin mein kuch latafat thee
Pyar ki halawatt thee
Gou ke un dinoo hum se
Shehar ko adaawat thee
Phir bhi ay meri janaan !
Hans ke zakhm seh jaana
Apni ek aadat thee
Qehqahay na dabtay thay
Khush dilli rawayyat thee
Zindagi ke woh lamhay
Ab tu khwaab lagte hain
Zindagi ke yeh Lamhay
Ek azaab lagte hain … *
*
Kabhi shab se kabhi sehar se larra karti thee
mudatein huwen ek shamma yahan jala karti thee
Kya baat huee keh aaj sar-e-sham band ho gayee
Ek khirrkee jo kabhi ta sehar khula karti thee
Sehamta hai dil kyoon ab ki bar is toofan mein
Garajte the badal bijli pehlay bhee gira karti thee
Kuch rang yaas me kusht-e-armaan ka hai warna
Naomeedi is dil se door hee raha karti thee
Khata meri hee thee jo dunya se dil laga baitha
Yeh kambakht zindagi pehlay kab kisi se wafa karti thee
Main un se kah raha hoon mujhe yaad kijiye
Kabhi meri yaad jin ki dharrkan huwa karti thee
**
Dekho aaj ham un ki dunya me shamil hee nahin
Jin ki dunya kabhi bas ham se huwa karti thee ...**
Kisi ke waday pe kyon aitbaar hum ne kiya
Na aane waloon ka kyon intezaar hum ne kiya
Na woh hamaaray huwe, aur na hum apne rahay
Muhabatton ka ajjab karoobaaar hum ne kiya
Woh khel khail rahay thay, woh khel khail chukay
Khatta hamaari thee, kyon un se pyar hum ne kiya ...
*Kabhi shab se kabhi sehar se larra karti thee *
*mudatein huwen ek shamma yahan jala karti thee *
*Kya baat huee keh aaj sar-e-sham band ho gayee *
*Ek khirrkee jo kabhi ta sehar khula karti thee *
*Sehamta hai dil kyoon ab ki bar is toofan mein *
*Garajte the badal bijli pehlay bhee gira karti thee *
*Kuch rang yaas me kusht-e-armaan ka hai warna *
*Naomeedi is dil se door hee raha karti thee *
*Khata meri hee thee jo dunya se dil laga baitha *
*Yeh kambakht zindagi pehlay kab kisi se wafa karti thee *
*Main un se kah raha hoon mujhe yaad kijiye *
*Kabhi meri yaad jin ki dharrkan huwa karti thee *
***Dekho aaj ham un ki dunya me shamil hee nahin ***
***Jin ki dunya kabhi bas ham se huwa karti thee ...***
Zaberdast !!
*
Us ne kaha thaa
Telephone per lambi lambi
baatein karne se behtar hai
Uski yaad mein chand aansoo
Beh jaayein
Ya ho jaye koi Nazm !
So ab mere aansoo hain ke
Tham'tay nahee
Aur
Nazm mukamal nahee hoti ...
Us ne meri aankhoon mein dekha
Aur kaha …
Suno … !
Tumhaari hansi mein
Meri jaan basi hai
Mein ne sun kar
Aik aah bhari
Aur apne sare ashk senay mein utaar leye …
*
Jis ki jhankaar mein dil ka araam thaa
Woh tera naam thaa …
Mere hontoo pe raqsaan jo ek naam thaa
Woh tera naam thaa …
Tohmattain mujh per aati rahee hain kaeen
Ek se ek naee
Khoobsurat magar jo aik ilzaam thaa
Woh tera naam thaa …
Subah se shaam tak jo mere paas thee
Woh teri aas thee
Shaam ke baad jo kuch lab-e-baab thaa
Woh tera naam thaa …
Dost jitne thay na-aashnaa hogaye
Pa-risaa hogaye
Saath mere jo ruswa sar-e-aam thaa
Woh tera naam thaa …
*
Ab kya likhain hum kaagaz per
Ab likhne ko kya baaqi hai
Ek dil thaa so ab toot gaya
Lutnay ko ab kya baaqi hai
Ek shaks ko hum ne chaaha thaa
Kuch rait pe naqsh banaaya thaa
Woh rait tu kab ki bikhar gaee
Woh naqsh ab kahaan baaqi hai
Ab kya likhain hum kaagaz per
Ab likhne ko kya baaqi hai
Woh jin ko apni nazmoo ka
Unwaan banaaya kartay thay
Woh lafzoo ka bana kar taj mahal
Kagaz per sajaaya kartay thay
Woh hum ko akela chor kar
Sab rishtoon se munh morr gaya
Ab rishtay saaray soonay hain
Woh pyar kahaan ab baaqi hai
Ab kya likhain hum kaagaz per
Ab likhne ko kya baaqi hai ...
Ay Khuda ...
Ay Khuda aaj yeh kaam kar day
Taqdeer mein meri thori rad-o-badal kar day
Woh agar mera nahee hai tu ussay
Mera muqaddar kar day
Safar-e-judaee bahut kat'thin hai
Raah sehal kar day, manzil paas kar day
Nafrat jo bari hai, dooreyaan bhi bahut hai
Nafrat ko muhabbat kar, dooreyoon ko qurbat kar day
Nahee hai agar woh mera hamsafar
Khatam yeh safar kar day
Aur
Mujhe fana kar day ...
*
Mein bhool jaana chaahata hoon
Us ko
Us ki muabbat ko
Us ke saath beetay
Tamaam lamhoon ko
Us ke jazboo se pur-lehjoo ko
Haan mein
Sab kuch bhool jana chaahata hoon
Sab kuch
Lekin ...
Us ki yaadain
Har qadam per
Mera rasta rok leti hain
Aur
Mein chaahatay huwe bhi
Ussay bhool nahe paata
Kyon ke
Mein ne tu us se muhabbat ki thee
Aur us ne shaayad
Sirf dil-lagi ki thee
Bas dil-lagi ki thee ...
