aa bhii jaao kii zindagii kam hai
tum nahii.n ho to har Khushii kam hai
vaadaa kar ke ye kaun aayaa nahii.n
shahar me.n aaj raushanii kam hai
jaane kyaa ho gayaa hai mausam ko
dhuup ziyaadaa hai chaa.Ndanii kam hai
aa_iinaa dekh kar Khayaal aayaa
aaj kal un kii dostii kam hai
tere dam se hii mai.n mukammal huu.N
bin tere terii ‘Yamini’ kam hai
Yamini Das
baad muddat unhe.n dekh kar yuu.N lagaa
jaise betaab dil ko qaraar aa gaya
aarazuuo.n ke gul muskuraane lage
jaise gul_shan me.n jaan-e-bahaar aa gayaa
tashnaa nazare.n milii.n shoKh nazaro.n se jab
mai barasane lagii jaam bharane lagaa
saaqiiyaa aaj terii zaruurat nahii.n
bin piye bin pilaaye Khumaar aa gayaa
raat sone lagii subah hone lagii
shammaa bujhane lagii dil machalane lage
vaqt kii raushanii me.n nahaa_ii hu_ii
zindagii pe ajab saa nikhaar aa gayaa
har taraf mastiyaa.N har taraf dil_kashii
muskuraate dilo.n me.n Khushii hii Khushii
kitanaa chaahaa magar phir bhii uTh na sakaa
terii mahafil me.n jo ek baar aa gayaa
Roshan Nanda
chaahat kaa ek miiThaa miiThaa dard jagaane shaam Dhale
terii yaade.n aa jaatii hai.n mujhako rulaane shaam Dhale
terii zulfe.n in kaa.Ndho.n par teraa cheharaa haatho.n me.n
mai.n ne bhii dekhe hai.n kitane Khvaab suhaane shaam Dhale
har din ham se vaadaa karake yuu.N hii agar ta.Dapaaoge
ik din yuu.N hii ho jaaye.nge ham bhii diivaane shaam Dhale
din ke ujaale me.n to manaa luu.N laakh yatan se bahalaa luu.N
lekin dil kaa paagal pa.nchhii ek na maane shaam Dhale
Hasan Imam
daayam pa.Daa huaa tere dar par nahii.n huu.N mai.n
Khaak aisii zindagii pe ke paththar nahii.n huu.N mai.n
kyuu.N gardish-e-mudaam se ghabaraa na jaaye dil
insaan huu.N, pyaalaa-o-saaGar nahii.n huu.N mai.n
yaarab! zamaanaa mujh ko miTaataa hai kis liye
lauh-e-jahaa.N pe harf-e-mukarrar nahii.n huu.N mai.n
had chaahiye sazaa me.n uquubat ke waaste
aaKhir gunaahagaar huu.N, kaafir nahii.n huu.N mai.n
kis waaste aziiz nahii.n jaanate mujhe
laal-o-zumaruud-o-zar-o-gauhar nahii.n huu.N mai.n
rakhate ho tum qadam merii aa.Nkho.n se kyuu.n dareG
rutabe me.n mahr-o-maah se kamatar nahii.n huu.N mai.n
karate ho mujhako manaa-e-qadam_bos kis liye
kyaa aasmaa.N ke bhii baraabar nahii.n huu.N mai.n
'Ghalib' wazifaa_Khwaar ho, do shaah ko duaa
wo din gaye ki kahate the "naukar nahii.n huu.N mai.n"
Mirza Ghalib
ek bas tuu hii nahii.n mujhase Khafaa ho baiThaa
mai.n ne jo sa.ng taraashaa vo Khudaa ho baiThaa
uTh ke ma.nzil hii agar aaye to shaayad kuchh ho
shauq-e-ma.nzil me.n meraa aabalaapaa ho baiThaa
masalahat chhin gaii quvvat-e-guftaar magar
kuchh na kahanaa hii meraa merii sadaa ho baiThaa
shukriyaa ae mere qaatil ae masiihaa mere
zahar jo tune diyaa thaa vo davaa ho baiThaa
jaane 'Shehzaad' ko min_jumlaa-e-aadaa paakar
huuk vo uTThii ke jii tan se judaa ho baiThaa
Farhat Shehzad
faasalaa to hai magar ko_ii faasalaa nahii.n
mujhase tum judaa sahii dil se to judaa nahii.n
aasmaa.N kaa fikr kyaa aasmaa.N Khafaa sahii
aap ye bataa_iiye aap to Khafaa nahii.n
kashtiyaa.N nahii.n to kyaa hausale to paas hai.n
kah do naaKhudaao.n se, tum ko_ii Khudaa nahii.n
liijiye bulaa liyaa aap ko Khayaalo.n me.n
ab to dekhiye hame.n ko_ii dekhataa nahii.n
aa_iiye chiraaG-e-dil aaj hii jalaaye.N ham
kaisii kal havaa chale ko_ii jaanataa nahii.n
Shamim Karhani
haadase kyaa kyaa tumhaarii beruKhii se ho gaye
saarii duniyaa ke liye ham ajanabii se ho gaye
gardish-e-dauraa.N, zamaane kii nazar, aa.Nkho.n kii niind
kitane dushman ek rasm-e-dostii se ho gaye
kuchh tumhaarii gesuuo.n kii barahamii ne kar diyaa
kuchh a.Ndhere mere ghar me.n raushanii se ho gaye
yuu.N to ham aagaah the saiyaad kii tadbiir se
ham asiir-e-daam-e-gul apanii Khudii se ho gaye
har qadam "Sagar" nazar aane lagii hai.n ma.nzile.n
marhale tay merii kuchh aavaaragii se ho gaye
Sagar Nizami
ibaadat karate hai.n jo log jannat kii tamannaa me.n
ibaadat to nahii.n hai ik tarah kii vo tijaarat hai
jo Dar ke naar-e-dozaKh se Khudaa kaa naam lete hai.n
ibaadat kyaa vo Khaalii buzadilaanaa ek Khidamat hai
magar jab shukr-e-ne'mat me.n jabii.n jhukatii hai bande kii
vo sachchii bandagii hai ik shariifaanaa ita'at hai
kuchal de hasarato.n ko beniyaaz-e-mudd'a ho jaa
Khudii ko jhaa.D de daaman se mard-e-baaKhudaa ho jaa
uThaa letii hai.n lahare.n tahanashii.n hotaa hai jab ko_ii
ubharanaa hai to Garq-e-bahr-e-fanaa ho jaa
Josh Malihabadi
jab kisii se koii gilaa rakhanaa
saamane apane aaiiinaa rakhanaa
yuu.N ujaalo.n se vaasta rakhanaa
shammaa ke paas hii hava rakhanaa
ghar kii taamiir chaahe jaisii ho
is me.n rone kii jagah rakhanaa
masjide.n hai.n namaaziyo.n ke liye
apane ghar me.n kahii.n Khudaa rakhanaa
milanaa jhulanaa jahaa.N zaruurii ho
milane-jhulane kaa hausalaa rakhanaa
Nida Fazli
kaabe kii hai havas kabhii kuu-e-butaa.N kii hai
mujh ko Khabar nahii.n merii miTTii kahaa.N kii hai
kuchh taazagii ho lazzat-e-aazaar ke liye
har dam mujhe talaash naye aasamaa.N kii hai
hasarat baras rahii hai mere mazaar se
kahate hai.n sab ye qabr kisii naujavaa.N kii hai
qaasid kii guftaguu se tasallii ho kis tarah
chhipatii nahii.n vo jo terii zabaa.N kii hai
sun kar meraa fasaanaa-e-Gam us ne ye kahaa
ho jaaye jhuuT sach, yahii Khuubii bayaa.N kii hai
kyuu.N kar na aa_e Khuld se aadam zamiin par
mauzuu.N vahii.n vo Khuub hai, jo shay jahaa.N kii hai
urduu hai jisakaa naam hamii.n jaanate hai.n ‘Daag’
hindustaa.N me.n dhuum hamaarii zabaa.N kii hai
Daag Dehlvi
laa_ii hayaat aaye qazaa le chalii chale
na apanii Khushii aaye na apanii khushii chale
behatar to hai yahii ke na duniyaa se dil lage
par kyaa kare.n jo kaam na bedillagii chale
ho umr-e-Khizr bhii to kahe.nge ba_vaqt-e-marg
ham kyaa rahe yahaa.N abhii aaye abhii chale
duniyaa ne kis ka raah-e-fanaa me.n diyaa hai saath
tum bhii chale chalo yuu.N hii jab tak chalii chale
naazaa.N na ho Khirad pe jo honaa hai vo hii ho
daanish terii na kuchh merii daanishvarii chale
kam ho.nge is bisaat pe ham jaise bad_qimaar
jo chaal ham chale vo nihaayat burii chale
jaa ki havaa-e-shauq me.n hai.n is chaman se 'Zauq'
apanii balaa se baad-e-sabaa kahii.n chale
Ibrahim Zauq
mere Khudaa mujhe itanaa to mo'atabar kar de
mai.n jis makaan me.n rahataa huu.N us ko ghar kar de
ye raushanii ke ta'aqub me.n bhaagataa huaa din
jo thak gayaa hai to ab is ko muKhtasar kar de
mai.n zindagii kii duaa maa.Ngane lagaa huu.N bahut
jo ho sake to duaao.n ko beasar kar de
sitaaraa-e-saharii Duubane ko aayaa hai
zaraa ko_ii mere suuraj ko baa-Khabar kar de
qabiilaa vaar kamaane.n ka.Dakane vaalii hai.n
mere lahuu kii gavaahii mujhe niDar kar de
merii zamii.n meraa aaKhirii havaalaa hai
so mai.n rahuu.N na rahuu.N us ko baaravar kar de
mai.n apane Khvaab se kaT kar jiyuu.N to meraa Khudaa
ujaa.D de merii muTThii ko dar-ba-dar kar de
Iftikhar Arif
naavak a.ndaaz jidhar diidaa-e-jaanaa.N ho.nge
niim-bismil ka_ii ho.nge ka_ii bejaa.N ho.nge
taab-e-nazaaraa nahii.n aa_iinaa kyaa dekhane duu.N
aur ban jaaye.nge tasviir jo hairaa.N ho.nge
tuu kahaa.N jaayegii kuchh apanaa Thikaanaa kar le
ham to kal Khvaab-e-adam me.n shab-e-hijaraa.N ho.nge
phir bahaar aa_ii vahii dasht-e-naavardii hogii
phir vahii paao.n vahii Khaar-e-muGelaa.N ho.nge
naasihaa dil me.n tuu itanaa to samajh apane ke ham
laakh naadaa.N huye kyaa tujh se bhii naadaa.N ho.nge
ek ham hai.n ke huye aise pashemaa.N ke bas
ek vo hai.n ke ji.nhe.n chaah ke armaa.N ho.nge
minnat-e-hazarat-e-isaa na uThaaye.Nge kabhii
zindagii ke liye sharmi.ndaa-e-ehasaa.N ho.nge
umr to saarii kaTii ishq-e-butaa.N me.n "Momin"
ab aaKhirii vaqt me.n kyaa Khaak musalamaa.N ho.nge
Momin
os pade bahaar par aag lage kanaar me.n
tum jo nahii.n kanaar me.n luTf hii kya bahaar me.n
us pe kare Khudaa raham gardish-e-rozagaar me.n
apanii talaash cho.Dakar jo hai talaash-e-yaar me.n
ham kahii.n jaanevaale hai.n daaman-e-ishq cho.Dakar
ziist tere huzuur me.n, maut tere dayaar me.n
Jigar Moradabadi
paa-ba-gil sab hai.n rihaa_ii kii kare tadabiir kaun
dast-bastaa shahar me.n khole merii zanjiir kaun
meraa sar haazir hai lekin meraa munsif dekh le
kar rahaa hai mere fard-e-jurm ko tahariir kaun
merii chaadar to chhinii thii shaam kii tanhaa_ii ne
beridaa_ii ko merii phir de gayaa tashahiir kaun
niind jab Khvaabo.n se pyaarii ho to aise ahad me.n
Khvaab dekhe kaun aur Khvaabo.n ko de taabiir kaun
ret abhii pichhale makaano.n kii na vaapas aa_ii thii
phir lab-e-saahil gharaundaa kar gayaa taamir kaun
saare rishte hijrato.n me.n saath dete hai.n to phir
shahar se jaate hue hotaa hai daaman_giir kaun
dushmano.n ke saath mere dost bhii aazaad hai.n
dekhanaa hai khe.nchataa hai mujh pe pahalaa tiir kaun
Parveen Shakir
qurbato.n me.n bhii judaa_ii ke zamaane maa.Nge
dil vo bemehar ki rone ke bahaane maa.Nge
apanaa ye haal ke jii haar chuke luT bhii chuke
aur muhabbat vahii andaaz puraane maa.Nge
ham na hote to kisii aur ke charche hote
khalqat-e-shahar to kahane ko fasaane maa.Nge
dil kisii haal pe maane hii nahii.n jaan-e-'Faraz'
mil gaye tum bhii to kyaa aur na jaane maa.Nge
Ahmed Faraz
raaz-e-ulfat chhupaa ke dekh liyaa
dil bahot kuchh jalaa ke dekh liyaa
aur kyaa dekhane ko baaqii hai
aap se dil laga ke dekh liyaa
wo mere hoke bhii mere na hue
unako apanaa banaa ke dekh liyaa
aaj unakii nazar me.n kuchh hamane
sabakii nazare.n bachaa ke dekh liyaa
'Faiz', taqmiil-e-Gam bhii ho na sakii
ishq ko aazamaa ke dekh liyaa
Faiz Ahmed Faiz
saadagii par us kii mar jaane kii hasarat dil me.n hai
bas nahii.n chalataa ki phir Khanjar kaf-e-qaatil me.n hai
dekhanaa taqariir kii lazzat ki jo usane kahaa
mai.nne yah jaanaa ki goyaa yah bhii mere dil me.n hai
garache hai kis kis buraa_ii se vale baa ii.n hamaa
zikr meraa mujh se behatar hai ki us mahafil me.n hai
bas hujuum-e-naa umiidii Khaak me.n mil jaayagii
yah jo ik lazzat hamaarii sa_i-e-behaasil me.n hai
ra.nj-e-rah kyo.n khe.nchiye vaamaa.ndagii ko ishq hai
uTh nahii.n sakataa hamaaraa jo qadam ma.nzil me.n hai
jalvaa zaar-e-aatash-e-dozaKh hamaaraa dil sahii
fitanaa-e-shor-e-qayaamat kis kii aab-o-gil me.n hai
hai dil-e-shoriidaa-e-Gaalib tilism-e-pech-o-taab
raham kar apanii tamannaa par ki kis mushkil me.n hai
Mirza Ghalib
phir koii aayaa dil-e-zaar nahii.n koii nahii.n
raharau hogaa kahii.n aur chalaa jaayegaa
Dhal chukii raat biKharane lagaa taaro.n kaa Gubaar
la.Dakha.Daane lage aewaano.n me.n Khwaabiidaa chiraaG
so gaii rastaa tak tak ke har ek rahaguzaar
ajanabii Khaak ne dhu.ndalaa diye qadamo.n ke suraaG
gul karo shame.N ba.Daa do mai-o-miinaa-o-ayaaG
apane beKhwaab kiwaa.Do.n ko muqaffal kar lo
ab yahaa.N koii nahii.n, koii nahii.n aayegaa
Faiz Ahmed Faiz
udaas aa.Nkho.n se aa.Nsuu nahii.n nikalate hai.n
ye motiyo.n kii tarah siipiyo.n me.n palate hai.n
ghane dhue.N me.n farishte bhii aa,Nkh malate hai.n
tamaam raat khajuuro.n ke pe.D jalate hai.n
mai.n shaah raah nahii.n, raaste kaa patthar huu.N
yahaa.N savaar bhii paidal utar kar chalate hai.n
u.nhe.n kabhii na bataanaa mai.n unakii aa.Nkhe.n huu.N
vo log phuul samajhakar mujhe masalate hai.n
ye ek pe.D hai, aa is se milakar ro le.n ham
yahaa.N se tere mere raaste badalate hai.n
ka_ii sitaaro.n ko mai.n jaanataa huu.N bachapan se
kahii.n bhii jaauu.N mere saath saath chalate hai.n
Bashir Badr