Quran: Aur apne gharon me tiki raha karo, pehle dour-e-jahalat ki tarha bnao-singhaar ke saath na nikla karo aur namaz qaem karo aur zakaat adaa karo aur ALLAH aur Uske rasool ki ataat karo, ALLAH to chahta hai keh tumse napaki ko door kerde aur tumhain achi tarha paak saaf bna de (33) Aur jo tumhare gharon me ALLAH ki aayaat aur hikmat ki baatein parh ker sunai jati hain inhein yaad rakho, bilashuba ALLAH bara bareek-been aur baa-khabar hai (34)..
Reference: Surat-ul-Ahzaab, verse # 33 & 34..
Quran: Muhammad tum logon me se kisi ke baap nahi hain balke wo ALLAH ke rasool aur anbiya ke silsilay ko khatam kerne wale hain aur ALLAH TAA’LA har cheez ko khoob jaanta hai (40) Ay imaan walo! ALLAH ko baa-kasrat yaad kiya karo (41) Aur subha shaam Uski tasbeeh kiya karo (42) Wohi hai jo tum per rehmat naazil farmata hai aur Uske farishtay bhi tumhare liye dua-e-maghfirat kerte hain takeh ALLAH tumhain andheron se nikaal ker roshni ki taraf le jaye aur ALLAH momino per bohat meherbaan hai (43) Jis din wo ALLAH se mileingay unka istaqbaal salaam se hoga aur unke liye baa-izzat ajar tayar hai (44) Ay nabi! Humne aapko gawahi dene wala aur (jannat ki) khushkhabri dene wala aur (jahanum se) drane wala bheja hai (45)..
Reference: Surat-ul-Ahzaab, verse # 40, 41, 42, 43, 44 & 45..
Quran: Aur Suleman ke liye hawa ko musakhar ker diya tha wo subha ke waqt aik maah ki musafat aur sham ke waqt aik maah ki musafat teh kerti thi, neez Humne unke liye pighlay huye taanbay ka chashma baha diya aur baaz jin apne Rab ke hukam se unke samne kaam kerte thay aur unse koi Hamare hukam ki sartabi kerta to Hum usay (jinaat ko) bharakti hui aag ke azaab ka zaiqa chakhate thay (12) Wo jin suleman ke liye unki khwahish ke mutabiq unchi imartein, mujasmay aur hoz jitnay baray lagan bnate aur aik jagha jami rehne wali degein bnate thay, Humne kaha, ay aal-e-dawood! Tum log shukar ke tor per naik amal kerte raho aur Mere bando me se kam hi shukar-guzar hain (13) Phir jab Suleman per moat ka faisla kiya to jino ko zameen ke keeron ke siwa kisi cheez ne Suleman ki moat ka pata nahi diya, jo unki laathi ko khaye jaa rahe thay, pas jab suleman gir paray tab jino ko yaqeen hogaya (keh Suleman per moat waqeya ho chuki hai) agar wo jin ghayeb ka ilm jante hote to aise zillat ke azaab me na paray rehte (14)..
Reference: Surat-ul-Saba, verse # 12, 13 & 14..
Quran: Tumhare maal aur aulaad aisi cheezein nahi hain jinse tum Humare qareeb aa sako balke jo shakhs imaan laye aur naik amal kare (wo qareeb aa sakta hai), Yehi log hain jinhein unke aimaal ka dugna silah milega aur wo jannat ke baala khano me aman-o-chain se raheingay (37) Aur jo log Hamari aayaat ko neecha dikhane me zor sarf ker rahe hain unhein azaab me daal diya jaega (38) Aap unse keh dijiyey keh: “Mera Rab apne bando me jiske liye chahe rizq wasee ker deta hai aur jiske liye chahe kam ker deta hai aur jo kuch tum kharch kerte ho to Wohi uski jagah tumhain aur de deta hai aur Wohi sabse behtar raaziq hai” (39)..
Reference: Surat-ul-Saba, verse # 37, 38 & 39..
Quran: Sab tareef ALLAH ke liye hai jo aasmaan aur zameen ko peda kerne wala aur farishton ko peghaam rasaan bnane wala hai jinke do do, teen teen aur chaar chaar par hain, Wo apni makhlooq (ki takhleeq) me jesay chahe izafa kerta hai kyunke Wo har cheez per Qadir hai (1) ALLAH agar logon ke liye apni rehmat ka (darwaza) khol de to isay koi band kerne wala nahi aur jisay Wo band kerde to iske baad usay koi kholne wala nahi aur Wo ghalib hakeem hai (2) Logo! Apne aap per ALLAH ka ehsaan yaad karo, ALLAH ke siwa koi khaliq hai jo tumhain aasmaan-o-zameen se rizq de (yaad rakho) Uske siwa koi mabood nahi, phir tum kahan se dhoka khaa jate ho (3)..
Reference: Surat-ul-Faatir, verse # 1, 2 & 3..
Quran: Logo! ALLAH ka wada sacha hai lehaza tumhain duniya ki zindagi dhokay me na daal de aur na ALLAH ke bare me dhokay-baaz (shetan) tumhain dhoka dene paye (5) Shetan yaqeenan tumhara dushman hai, lehaza tum bhi us se dushmani rakho, wo apne perokaron ko sirf is liye bulata hai keh wo jahanami ban jaen (6) Jo kafir huye unhein sakht azaab hoga aur jo log imaan laye aur naik amal kiyey unke liye bakhshish aur bohat bara ajar hai (7)..
Reference: Surat-ul-Faatir, verse # 5, 6 & 7..
Quran: Wo raat ko din me aur din ko raat me daakhil kerta hai aur Usne suraj aur chaand ko kaam per laga diya hai, har aik muqarar muddat tak chalta rahega, Wohi ALLAH tumhara Rab hai, Us hi ki baadshahi hai aur Usay chor ker jin dafan shuda (murday, peeron aur faqeeron) ko tum pukarte ho wo to khajoor ki guthli ke chilkay ke bhi maalik nahi (13) Agar tum unhein pukarogay to wo tumhari pukaar sun nahi sakte aur (farz karo) sun bhi lete to tumhain jawab nahi de sakte thay aur qayamat ke din to wo tumhare shirk ka inkaar hi ker deingay aur ALLAH ki tarha aapko koi dusra sahih khabar nahi de sakta (14) Logo! Tum sab Us ALLAH ke mohtaaj ho aur Wo (har cheez se) be-neyaaz aur tamaam tareefon ke laiq hai (15) Agar Wo chahe to tumhain le jaye aur (tumhari jagha) koi naiee khalqat le aaye (16) Aur ye baat ALLAH TAA’LA per koi mushkil nahi (17)..
Reference: Surat-ul-Faatir, verse # 13, 14, 15, 16 & 17..
Quran: Wo (jannati) hamesha rehne wale baghaat me daakhil hongay, wahan unhein sonay ke kangano aur motiyon se aarasta kiya jaega aur wahan unka libas resham ka hoga (33) Aur wo kaheingay ALLAH ka shukar hai jisne hum se gham door ker diya, yaqeenan hamara Rab bakhshne wala aur acha badla dene wala hai (34) Jisne apne fazal se is jannat me jagha di hai jo hamesha rehne ki jagha hai, yahan hamein na koi takleef pohanchegi aur na hi koi rukawat hogi (35) Aur jin logo ne kufar kiya unke liye jahanum ki aag hai, na to unka qissa paak kiya jaega keh wo mar jaen aur na hi unse jahanum ka azaab halka kiya jaega, Hum har na-shukray ko aisi hi saza diya kerte hain (36)..
Reference: Surat-ul-Faatir, verse # 33, 34, 35 & 36..
Quran: ALLAH TAA’LA yaqeenan aasmaano aur zameen ki chupi hui cheezon ko jan’ne wala hai, Wo to dilon ke raaz tak khoob janta hai (38) Wohi to hai Jisne tumhain zameen me janasheen bnaya, phir jo koi kufar kare to uske kufar ka wabaal usi ke sar per hai, aur kafiron ke liye unka kufar unke Rab ke nazdeek narazgi hi barhne ka bais hota hai aur phir un kafiron ka kufar khasaray me hi izafa kerta hai (39) Aap keh dijiyey keh apne un shareekon ko to zara dekho jinhein tum ALLAH ke siwa pukarte ho (aur) mujhe batlao keh unhon ne zameen ka konsa hissa peda kiya hai? Ya aasmaano me unki koi shrakat hai? Ya Humne inhein koi aisi tehreer di hai jiski roo se wo koi wazeh daleel rakhte hain? Balke ye zalim log aik dusre se sirf dhoka aur fareb ki baatein kerte hain (40) ALLAH TAA’LA yaqeenan aasmaano aur zameen ko thaamay huye hai keh kahin gir na jaen aur agar wo dono gir jaen to iske baad inhein koi bhi isi jagha barqarar nahi rakh sakta, bilashuba Wo bara burdbaad aur maaf kerne wala hai (41)..
Reference: Surat-ul-Faatir, verse # 38, 39, 40 & 41..
Quran: Logon ke liye murda zameen bhi aik nishani hai, Humne isay zinda kiya aur is se anaaj nikala jiska kuch hissa wo khate hain (33) Neez Humne isme khajooron aur angooron ke baagh paida kiyey aur iske andar se chashmay baha diyey (34) Takeh wo iske phal khayein, halakeh ye sab unke haathon ne nahi bnaya, phir kya wo shukar adaa nahi kerte (35) Paak hai Wo zaat Jisne zameen ke darakhton ke joray paida kiyey aur khud unki apni jins ke bhi aur unke bhi jinhein ye nahi jantay (36) Aur unke liye aik nishani raat hai jis se Hum din ko alag ker dete hain to un per andhera chaa jata hai (37) Aur suraj apni muqarar guzargaah per chal raha hai, ye nizaam Us ALLAH ka bnaya hua hai Jo bara zabardast, sab kuch jaan’ne wala hai (38) Aur chaand ki Humne manzilein muqarar ker di hain hata keh wo khajoor ki purani tehni ki tarha (patla) reh jata hai (39) Na suraj ye ker sakta hai keh chaand ko jaa pakray aur na raat din se pehle aa sakti hai, sab apne apne madaar me tezi se rawan dawan hain (40)..
Reference: Surat-ul-Yaseen, verse # 33 to 40..
Quran: Aur (jab) sur phunka jaega to wo (murday) foran apni qabron se (nikal ker) apne Rab ki taraf dor pareingay (51) Kaheingay: “Afsos! Hamein hamari khwabgah se kisne utha khara kiya”? Ye to wohi hai jiska Rehman ne wada kiya tha aur rasoolon ne sach hi kaha tha (52) Wo pas aik hi garajdaar awaz hogi phir wo foran sab ke sab Hamare hazoor paish ker diyey jaengay (53) Pas us din kisi per bhi zara bhar zulm na kiya jaega aur tumhain wesa hi badla diya jaega jese tum amal kerte rahe (54)..
Reference: Surat-ul-Yaseen, verse # 51, 52, 53 & 54..
Quran: Un farishton ki qasam jo (aasmaano me) safein bandhay huye hain (1) Phir unki jo (badlon ko) zabardast daant ke zariyey haanktay hain (2) Phir un farishton ki qasam jo zikar-e-ALLAH ki tilawat kerte hain (3) Bilashuba tumhara mabood aik hi hai (4) Jo aasmaano aur zameen aur unke dermiyaan ki har cheez ka Rab hai aur duniya ke un tamaam muqamaat ka Rab hai jahan se suraj nikalta hai (5) Bilashuba Humne aasmaan (aur) duniya ko sitaron ke zariyey khoobsurat bnaya hai (6) Aur is (aasmaan aur duniya ko) har taraf se sarkash shetan se mehfooz bna diya hai (7) Wo sheyateen aalim-e-baala ki baatein sun hi nahi sakte aur (agar ye baatein sun’na chahein to) har taraf se in per (shahab) phenkay jate hain (8) Takeh wo bhaag kharay hon aur unke liye daemi azaab hai (9)..
Reference: Surat-ul-Saafaat, verse # 1 to 9..
Quran: Phir wo (jannati) jhankega to usay jahanum ke aein dermiyaan dekhega (55) Aur kahega: ALLAH ki qasam! Tum to mujhe halaak kerke hi chortay (56) Aur agar mujh per mere ALLAH ka ehsaan na hota to me bhi (tumhari tarha jahanum me) hazir kiyey huye logon me hota (57) (Wo dil me kahega) Kya hamein mot nahi aayegi? (58) Siwaye pehli mot ke jo aa chuki aur ab hamein azaab bhi nahi hoga (59) Yaqeenan ye bohat bari kaamyaabi hai (60) Aisi kaamyaabi ke liye amal kerne walon ko amal kerne chahiyein (61) (Batlao) Aisi zeyafat achi hai ya zaqoom ke darakht ki? (62) Beshak Humne is darakht ko zalimo ke liye aik aazmaish bna diya hai (63) Wo aisa darakht hai jo jahanum ki teh se nikalta hai (64) Uske shagoofay aise hain jaise shetaano ke sar (65) (Ahl-e-Jahanum) isi ko khayeingay aur is se apne pait bhareingay (66) Phir is per unhein peene ko peep mila kholta pani milega (67) Phir unhein jahanum ki taraf lotna hoga (68)..
Reference: Surat-ul-Saafaat, verse # 55 to 68..
Quran: Phir jab wo beta unke hamrah dor lagane ki umar ko pohanch gaya to Ibrahim ne kaha: Betay! Mene khwab dekha hai keh me tumhain zibah ker raha hu, ab batlao tumhari kya raye hai?? Betay ne kaha: Abba jaan! Wohi kuch kijiyey jo aapko hukam hua hai, aap inshaALLAH mujhe sabar kerne wala payeingay (102) Phir jab dono ne sar tasleem-e-kham ker diya aur Ibrahim ne betay ko peshani ke bal gira diya (103) Tab Humne usay pukara: Ay Ibrahim! (104) Tumne khwab ko sach ker dikhaya, Hum yaqeenan naiki kerne walon ko aise hi sila dete hain (105) Bilashuba ye aik khuli aazmaish thi (106) Aur Humne is larkay ke fidyey ke tor per aik bara janwar bhaij diya (yani ALLAH TAA’LA ne jannat se Jibrael ke zariyey aik maindha bhaij ker Ismail ki jagha isay zibah kerwa diya) (107) Aur ainda aane wali naslon me Humne iska (zikar-e-khair) baqi rakha (108) Ibrahim per salaam ho (109) Hum naiki kerne walon ko aise hi badla diya kerte hain (110) Bilashuba wo Hamare momin bandon me se thay (111)..
Reference: Surat-ul-Saafaat, verse # 102 to 111..
Quran: Aur Yunas bhi bilashuba rasoolon se thay (139) Jab wo (aik bhari hui kashti) ki taraf (bethne ke liye) bhaag nikle (140) Phir (kashti ka bojh ziada hone ki waja se) qura dala gaya (takeh kashti me log kam ker sakein) to wo haar gaye (141) Chunachay (inhein samundar me phenk diya gaya) machli ne inhein nigal liya aur wo apne kiyey per sharamsaar thay (142) Ab agar wo tasbeeh kerne walon me se na hotay (143) To youm-e-qayamat tak machli ke pait me paray rehte (144) Phir Humne aik chatiyal medaan me phenk diya jabkeh wo beemar thay (145) Aur un per saya kerne wala aik baildaar darakht ugaa diya (146) Aur (baad me) inhein aik laakh ya is se ziada logon ki taraf bheja (147) Chunachay wo log imaan laye to Humne inhein kuch muddat zindagi se faida uthane ka moqa diya (148)..
Reference: Surat-ul-Saafaat, verse # 139 to 148..
Quran: Neez Humne Suleman ko aazmaish me dala aur inke takht per aik jisam daal diya phir unhon ne ruju kiya (34) Kaha, Ay mere Rab! Mujhe maaf farma aur mujhe aisi hakumat de jo mere baad kisi ke laiq na ho bilashuba Tu bara ataa kerne wala hai (35) Chunachay Humne hawa ko inke tabay ker diya jahan aapko (baadbaani kashti ke zariyey) pohanchna hota to wo (hawa) aapke hukam per narmi se chalti aur wahan pohancha deti (36) Aur shetan (taqatwar jino ko) bhi tabay ker diya jo sab imarat bnane wale aur ghotakhor thay (37) Aur kuch dusre (jinaat ko bhi jo) zanjeeron me jakray huye thay (38) (Humne Suleman se kaha) Ye Hamara atiya hai, aap chahein to dusron ko isme se dijiyey ya na dijiyey, iska aapse koi hisaab nahi hoga (39) Bilashuba inko Humse qurbat hasil thi aur inka thikana acha hai (40)..
Reference: Surat-ul-Suaad, verse # 34 to 40..
Quran: Aur baaghiyon ke liye bohat bura thikana hoga (55) Yani jahanum, jisme wo dakhil hongay jo bohat buri jagah hai (56) Ye hai unka anjaam ab wo maza chakhein kholtay huye paani ka aur peep ka (57) Aur aisi hi dusri cheezon ka (58) Ye (sardaraan-e-kufar ka) aik groh hai jo tumhare saath (aag me) jaane wala hai (jahanum ke darwazon per kharay farishtay kaheingay) unke liye koi khushamdeed nahi hai beshak ye log aag ke azaab me dakhil hone wale hain (59) (Jahanami) kaheingay, balke tum sardaron ke liye koi khushamdeed nahi hai, tum hi ne to is azaab ko hamare liye bhaij diya tha, pas jahanum bura thikana hai (60) Wo kaheingay, ay hamare Rab jo hamare liye is azaab ka sabab bana hai Tu jahanum me uska azaab dugna kerde (61)..
Reference: Surat-ul-Suaad, verse # 55 to 61..
Quran: Jabkeh aapke Rab ne farishton se kaha tha keh Me mitti se aik insan bnane wala hoon (71) To jab me usay darust ker doon aur usme rooh phoonk doon to tum uske samne sajda raiz hojana (72) Chunachay sab farishton ne sajda kiya (73) Siwaye iblees ke jisne takabur kiya aur kafiron me se hogaya (74) ALLAH ne pucha: Ay iblees! Jisay Mene apne hathon se bnaya to isay sajda kerne se tujhe kis baat ne rok diya?? Kya bara ban’na chahta hai ya hai hi uncha darja rakhne walon se?? (75) (iblees) kehne laga me is se behtar hoon (kyunke) mujhe Tunay aag se peda kiya hai aur isay mitti se peda kiya hai (76) ALLAH TAA’LA ne farmaya: Nikal jaa yahan se yaqeenan tu mardood hai (77) Aur youm-e-qayamat tak tujh per Meri lanat barasti rahegi (78) Wo kehne laga mere Rab! Phir mujhe us waqt tak mohlat dede jab log dobara uthaye jaengay (79) ALLAH ne farmaya: “Acha! tumhain mohlat di jati hai (80) Us din tak jiska waqt Mujhe maloom hai” (81) Wo kehne laga Teri izzat ki qasam! Me sab (insano ko) gumrah kerke chorunga (82) Siwaye Tere un naik bandon ke jo mukhlis hongay (83) ALLAH ne farmaya: “Haq ye hai aur Me haq hi kaha kerta hoon (84) Keh Me jahanum ko tujhse aur un sab logon se bhar dunga jo teri perwi kareingay” (85)..
Reference: Surat-ul-Suaad, verse # 71 to 85..
