Come And Lets Read The 'Holy Qur'an' - With Translation

Society Religion & Philosophy
281

Quran: Agar tum kufar karogay to ALLAH yaqeenan beneyaaz hai (lekin) Wo apne bandon ke liye kufar per raazi nahi aur agar tum shuker karo to Wo isay tumhare liye pasand kerta hai, (roz e qayamat) koi gunah ka bojh uthane wala kisi dusray ka bojh nahi uthayega phir tumhain apne Rab ke haan lotna hai, Wo tumhain batla dega jo kuch tum kerte rahe ho, bilashuba Wo seeno ke raaz tak jaanta hai (7)..

Reference: Surat-ul-Zumar, verse # 7..

282

Quran: ALLAH ne behtareen kalaam nazil kiya jo aisi kitaab hai jiske mazameen milte julte aur baar baar dohraye gaye hain jinse un logon ke badan kaanp jaate hain jo apne Rab se darte hain phir unke jisam aur unke dil naram hoker ALLAH ke zikar ki taraf raaghab hote hain, yehi ALLAH ki hidayat hai, Wo jisay chahta hai Quran ke zariyey hidayat deta hai aur jisay ALLAH gumrah karay usay koi hidayat dene wala nahi..

Reference: Surat-ul-Zumar, verse # 23..

283

Quran: ALLAH TAA’LA aik aise shakhs (yani ghulam) ki misaal beyaan kerta hai jo kaiee jhagralu aadmiyon ka ghulam hai aur dusra sirf aik aadmi ka ghulam hai, kya in dono ghulamon ki halat aik jesi ho sakti hai? (Yani mushrik mukhtalif maaboodon ke dermiyaan pareshan rehta hai aur moohid aik Rab ul Aalameen per tawakal kerta hai aur sukoon se zindagi guzarta hai) Alhamdulillah! Lekin aksar log ye baat nahi jantay (29)..

Reference: Surat-ul-Zumar, verse # 29..

284

Quran: Aur agar aap un (kafiron) se puchein keh: aasmaano aur zameen ko kisne peda kiya? To yaqeenan kaheingay keh “ALLAH ne” Aap inhein keh dijiyey keh bhala dekho, jinhein tum ALLAH ke siwa pukarte ho, agar ALLAH mujhe koi takleef pohanchana chahe to tumhare mabood USKI pohanchai hui takleef ko door hataa sakte hain? Ya agar WO mujhper rehmat kerna chahe to ye Uski rehmat ko rok sakte hain? Aap inse keh dijiyey keh mujhe to ALLAH hi kafi hai (aur) tawaqqal kerne wale USI per tawaqqal kerte hain (38)..

Reference: Surat-ul-Zumar, verse # 38..

285

^ Subhanallah. Beautiful thread

286

[quote=““humming bird””]
^ Subhanallah. Beautiful thread
[/quote]

JazakALLAH Khair..

287

Quran: Aur jab sor phoonka jaega to jo bhi aasmaano aur zameen me mojood makhlooq hai sab behosh ho ker gir pareingay magar jisay ALLAH (bachana) chahe, phir jab dusri baar sor phoonka jaega to foran uth ker dekhne lageingay (68) Aur zameen apne Rab ke noor se jagmaga uthegi aur (sab ki) kitaab-e-aimaal laa ker rakhdi jaegi aur anbiya aur tamaam gawah hazir kiyey jaengay aur logon me insaf ke saath faisla hoga aur unpe zulm nahi hoga (69) Aur har shakhs ne jo amal kiya hoga usay uska pura badla diya jaega aur jo wo ker rahe hain ALLAH usay khoob jaan’nay wala hai (70)..

Reference: Surat-ul-Zuman, verses # 68, 69 and 70..

288

Quran: Aur jin logon ne kufar kiya unhein pukara jaega keh (aaj) jitna ghussa tumhain apne aap per aaraha hai ALLAH ko tum per is se ziada ghussa aata tha jab tumhain imaan ki taraf dawat di jati to tum inkaar ker dete thay (10)..

Reference: Surat-ul-Momin, verse # 10..

289

Quran: Aur (ay Nabi) inhein (qareeb) aa pohanchne wale din se daraiyey jab logon ke dil gham ke maaray ghat ker halaq tak pohanch jaengay (us din) zalimo ka na koi himayati hoga aur na aisa sifarishi jiski baat maani jaye (18) ALLAH TAA’LA nazron ki khayanat ko bhi jaanta hai aur un chuppi hui baaton ko bhi jo seeno me chuppa rakhi hain (19) Aur ALLAH hi insaaf ke saath faisla karega aur ALLAH ke ilawa jinhein ye log pukarte hain wo to kuch bhi faisla nahi ker sakte, bilashuba ALLAH hi sab kuch sun’nay aur dekhne wala hai (20)..

Reference: Surat-ul-Momin, verse # 18, 19 & 20..

290

Quran: Jo shakhs burai karega usay utna hi badla diya jaega aur jo bhi acha amal karega khwah mard ho ya aurat bashart ye keh wo momin ho to aise log jannat me daakhil hongay aur wahan unhein behisaab rizq diya jaega (40)..

Reference: Surat-ul-Momin, verse # 40..

291

Quran: Pas ALLAH ne usay firon aur fironiyon ki buri saazishon se bacha liya aur fironiyon ko buray azaab ne ghair liya (45) Wo subah o shaam aag me paish kiyey jate hain aur jis din qayamat hogi to hukam hoga keh shadeed tareen azaab me fironiyon ko daakhil kar do (46)..

Reference: Surat-ul-Momin, verse # 45 & 46..

292

Quran: Aasmaano aur zameen ko peda kerna insano ke peda kerne se ziada baRa kaam hai lekin aksar log nahi hantay (57) Aur naa-beena aur beena yaksaan nahi ho sakte aur wo log jo imaan laaen aur achay amal karein wo aur buray kaam kerne wale yaksaan nahi ho sakte (magar) tum log kam naseehat qabool kerte ho (58) Bilashuba qayamat aane wali hai jisme koi shak nahi lekin aksar log imaan nahi laatay (59) Aapke Rab ne farmaya hai: Mujhe pukaro me tumhari dua qabool karunga, jo log meri ibadat se naak bhawein charhate hain anqareeb zaleel o khwaar ho ker jahanum me daakhil hongay (60)..

Reference: Surat-ul-Momin, verse # 57, 58, 59 & 60..

293

Quran: Jabkeh unki gardano me toq paray hongay aur aisi zanjerein jinke zariyey ghaseetay jaengay (71) Wo kholtay huye pani me, phir aag me jalaye jaengay (72) Phir unse pucha jaega: Kahan hain wo jinhein tum ALLAH ke shareek banaya kerte thay (73)..

Reference: Surat-ul-Momin, verses # 71, 72 &73..

294

Quran: Aur jab unhon ne Hamara azaab dekh liya to kehne lagay: Hum ALLAH akele per imaan laaye aur un jhootay maboodon ka inkaar kerte hain jinhein ALLAH ka shareek bnate thay (84) Magar jab unhon ne Hamara azaab dekh liya to unke imaan ne unhein kuch faida na diya yehi Sunnat-e-Illahi hai jo hamesha uske bandon me jaari rahi hai aur is (azaab ke) moqa per kafir log khasaray me parr gaye (85)..

Reference: Surat-ul-Momin, verses # 84 & 85..

295

Quran: Aur jis din ALLAH ke dushman jahanum ki taraf haank ker laye jaengay to unhein rok liya jaega (19) Yahan tak keh jab (sab) jahanum ke qareeb aa pohancheingay to unke kaan, unki aankhein aur unki khaalein unke khilaaf wohi gawahi deingay jo wo amal kiya kerte thay (20)..

Reference: Surat-ul-Sajada, verses # 19 & 20..

296

Quran: Jin logon ne kaha keh hamara Rab ALLAH hai phir wo is per datt gaye un per farishtay naazil hote hain unse kehte hain keh naa daro aur naa ghamgeen ho aur is jannat ki khushi manao jiska tumse waada kya jata hai (30) Hum duniya ki zindagi me bhi tumhare dost hain aur aakhrat me bhi, wahan tumhara jo jee chahega tumhain milega aur jo kuch maangogay tumhara hoga (31)..

Reference: Surat-ul-Sajada, verses # 30 & 31..

297

Quran: Naiki aur badi kabhi braber nahi ho saktay aap badi ka jawab achai se dijiyey to (aap dekheingay keh) jis shakhs ki aapke saath adawat thi wo bhi aapka gehra dost ban jaega (34)..

Reference: Surat-ul-Sajada, verse # 34..

298

Quran: Jisne koi naik amal kiya uska faida usi ko hoga aur agar burai karega to iska wabaal usi per hai aur Aap ka Rab bandon per zulm kerne wala nahi (46)..

Reference: Surat Haa-Meem Sajadah, verse # 46..

299

Quran: Kya un logon ne ALLAH ke siwa dusron ko madadgaar bna liya hai? Pas wo jaan lein keh ALLAH hi haqeeqi madadgaar hai aur Wohi murdon ko zinda karega aur Wo har cheez per qadir hai (9) Aur tum jis cheez me bhi ikhtilaaf karo uska faisla ALLAH ki taraf hi lotna hai, Wohi ALLAH mera Rab hai, me Usi per bharosa ker chuka hoon aur Usi ki taraf ruju kerta hoon (10)..

Reference: Surat-ul-Shoora, verses # 9 & 10..

300

Quran: ALLAH apne bandon per mehrbaan hai jisay (jitna) chahta hai rizq deta hai aur Wo taqatwar aur zabardast hai (19) Jo shakhs akhirat ki kheti (yani ajar o sawab) chahta hai to Hum uski kheti barha dete hain aur jo duniya ki kheti chahte hain to Hum usay iska kuch hissa de dete hain aur akhirat me isay koi hissa nahi milega (20)..

Reference: Surat-ul-Shoora, verses # 19 & 20..