Zindagi ka wo kuch bhi lutf utha nahi sakte
intehaa-e-gham mein jo muskura nahi sakte
ehl-e-haq ki fitrat hai haq pa aanch jab aay
ser kataa tu sakte hain ser jhuka nahi sakte
dil pe haat rakh leejiye dekhiye mein kehta huun
aap mere naalon ki taab la nahi sakte
saath kis jagah chora tuu ne taqat-e-parwaaz
saamne nasheman hai urh ke ja nahi sakte
aapka mareez-e-gham aesee neend soya hai
aap bhi agar chahein ab jaga nahi sakte
her maqaam deta hai yun dawat-e-sajda
her maqaam per lekin ser jhuka nahi sakte
khaas maekada hai yaan ehl-e-hosh aate hain
aap pee tu sakte hain larkhara nahi sakte
aapne karnaame per barq yun akarhti hai
jaese aashiyana hum phir bana nahi sakte
ye bata tu sakte hain kis ne gham diya ham ko
gham mein kitni lazzat hai ye bata nahi sakte
haan usee ko kehte hein ay Saeed majboori
bhuulne pa bhi unn ko hum bhula nahi sakte
By: Saeed Shaheedi