**salaam dosto,
roz-marra kii zindagii meN kaii baar apnii baat ko jaam’e andaaz se kehne ke liye ham ash’aar yaa misr’on ka iste’maal karte haN, Yeh ash’aar yaa misr’e zarb-ul-imsaal ki Haisiyat iKhtiyaar kar jaate haiN…magar, in meN se beshtar misr’e aise hote haiN jinke duusre misr’e hameN ma’luum nahiiN hote, yaa shaa’ir ka naam nahiiN pataa hotaa. aise kuch ash’aar kaa ham yahaaN zikr-e-Khair kareNge, iA.
maiN kuchh ash’aar ke vo mir’e darj kar rahaa huN jo zabaan-e-zad-e-'aam haiN…aapko bas uskaa vo Ghair maanoos misr’a likhnaa hogaa jo she’r ko mukammil kar de…mere Khayaal se kaafii dil-chap hogaa yeh silsilaa…
to aaiye bismillah karte haiN…is laRii meN aapkii shamooliyat aur shiraakat ke liye aapkaa qabl az waqt [peshgii] shukria adaa kartaa huN. to, mulaaHIzah farmaaiye:
bahot be-aabroo ho kar tire kooche se ham nikle
abhii kuchh log baaqii haiN jahaaN meN
pahoNchii vahiiN pe Khaak jahaaN kaa Khameer thaa
sar-e-tasleem Kham hai jo mizaaj-e-yaar meN aaye
kahtii hai tujhko Khalq-e-Khuda Ghaaibaana kia!
to Good Luck and Happy Linkage :)**