zaraa sii der ko aaye thay Khvaab aaNkhon mein
phir us ke baad musalsal azaab aaNkhon mein
vo jis ke naam kii nisbat se raushan thaa vujuud
khaTak rahaa hai vahii aaftaab aaNkhon mein
jinhein mataa-e-dil-o-jaaN samajh rahay thay hum
vo aaiine bhii hue behijaab aaNkhon mein
ajab tarah kaa hai mausam ke Khaak uDatii hai
vo din bhii the ke khile the gulaab aaNkhon mein
mere Gazaal terii vahashaton kii Khair ki hai
bahut dinon say bahut iztaraab aaNkhon mein
na jaane kaisii qayaamat kaa pesh_Khemaa hai
ye uljhane terii be-intasaab aaNkhon mein
