Yeh zara hi pehlay ki baat hai ke kisi ke dil ki duwaa thaa main
Nau’khaiz bahaar ki jawaneyoon mein kisi ko azeez huwa thaa main
Kisi ke khwaboon ki jaan thaa main, kisi ki aankhoon ki taazgi
Muhabbatoon ka toofan ban kar kisi ke dil mein uthaa thaa main
Mere hasool ki intehaa, mujhe mannattoon mein maanga gaya
Kisi mehjabeen ke ratjagoon ki riyazattoon ka sila thaa main
Meri deed hi us ki eid thee, meri tasveer thee jis ki kitaab mein
Muhabbat bharay ek masoom dil ki ibadattoon ka Khuda thaa main
Yeh ussi haseen ki hain inayyattain ke mere saath tu thee lekin mujhe
Shikasta ka tauq pehna diya, zara saans lene ko ruka thaa main
