zabaan-e-Hind hai urdu to maathe ki shikan kyoon hai
*vatan main be-vatan kyoon hai *
meri mazloom urdu teri saanso main ghutan kyoon hai
teraa lahjaa mahkataa hai to lafzon main thakan kyoon hai
agar too phoo hai to phool main itani chubhan kyoon hai
vatan main be-vatan kyoon hai
ye naanak ki ye khusro ki dayaa shankar ki boli hai
ye divaali ye baisaakhi ye id-ul-fitr holi hai
magar ye dil ki dhadkan aaj kal dil ki jalan kyoon hai
vatan main be-vatan kyoon hai
ye naazon se pali thi mir ke ghaalib ke aangan main
jo sooraj ban ke chamaki thi kabhi mahlon ke daaman main
vo shah-zaadi zabaanon ki yahaan be-anjuman kyoon hai
vatan main be-vatan kyoon hai
muhabbat kaa sabhi elaan kar jaate hain mehafil main
ke is ke vaaste jazbaa hai ham-dardi kaa har dil main
magar haq maangane ke vaqt ye begaanaapan kyoon hai
vatan main be-vatan kyoon hai
ye dosheezaa jo baazaaron se ithalaati guzarati thi
labon ki naazuki jis ki gulaabon si bikharatii thi
jo tahazibon ki sar ki odhani thi ab kafan kyoon hai
vatan main be-vatan kyoon hai
muhabbat kaa agar daavaa hai to is ko bachaao tum
jo vaadaa kal kiyaa thaa aaj vo vaadaa nibhaao tum
agar tum raam ho to phir ye raavan kaa chalan kyoon hai
vatan main be-vatan kyoon hai
+++++++++++++++
Manzar Bhopali
+++++++++++++++
Poet’s thoughts indicate opposition to urdu by some people in UP/MP..I guess.