Sarwar Alam Raz Sarwar
zaalim Hayaat, chaal mire saath chal gayee
subH.e.umeed, shaam.e.GhareebaaN meiN Dhal gayee!
kyaa e’tibaar.e.umr.e.gurezaaN kare ko’ee
jhapkee zaraa jo aaNkh to duniyaa badal gayee!
yaadoN ke ham jalaate bujhaate rahe chiraaGh
chaliye! isee bahaane tabee’yat behal gayee!
duniyaa.e.naa.muraad meiN aasoodigee kahaaN?
sau aur aayeeN, aik jo Hasrat nikal gayee!
phir zindigee shikaar.e.umeed.e.vafaa huee
phir sham’a.e.intizaar sar.e.shaam jal gayee!
taa umr apnee zaat se baahar na jaa sake!
ahl.e.Khirad se un kee Khudee chaal chal gayee!
Sarwar ne teree yaad meiN ik umr kee tamaam
or log keh rahe haiN, tamannaa nikal gayee!