Chir gai uss se ihl e dil ki baat
Dekhiye kia ho surat e halaat
Zindagi hai udaas aur tanha
Jaise yakh basta kohsaar ki raat
Her taraf hai hujoom e tanhai
Jaise jungle main wehshiyon ki baraaat
**
Kitni kam yaab hai mata e khuloos
Yum e aashoor jaise moj e Furaat
Raat tu iss tarah se yaad aya
jaise nazil hon zehn pe aayat**
Mawra hai huroof se wo badan
shal hui ja rahi hain tashbeehat
Kis ne cheena tabassum e gham e dost
Doobti ja rahi hai nabz e hayaat
**
Maine mana hai aise khaliq ko
jis ki takhleeq ko nahin hai sabaat
Aise taqseem ho raha hai bashar
jis tarah baant de koi khairaat**
Chand bhi patharon ki wadi hai
Dekh apni azeem takhleeqaat
Maine paya hai wo jahan Mohsin
Jis main mumkin nahin dukhon se nijaat
(Mohsin Naqvi)
