Yeh ajab uljhan hai k woh pass bhi hai door bhi
Aur main apne aap mein aazad bhi,mehsoor bhi
Laakh chaha k bhula doon us ko laikin kiya karon
Jab talak zindah hoon,apne dil se hoon majboor bhi
Mujh se jism-o-jaan ka rishta nahin tu phir bhala
Mere ghum per kiyon hua kerta hai woh ranjoor bhi
Yeh alag ik raaz k mil jayee tu bhar aaye dil
Aur akele mein use sooch’oon tu hoon maghroor bhi
Us ki khushboo sansoon se aaye tu hota hai gumaan
Mere dil pe hukmaran,dharkan pe woh mam’oor bhi
Zahir-o-batin mein woh hai,rooh mein,sansoon mein woh
Dhoop mein saaya bhi hai aur teergi mein noor bhi
Jadah-e-saqib hai us ka aur mera raasta
Phir bhi woh be-chain hai aur mein kassak se choor bhi
