Aadaab arz dosto!
Ek taazah Ghazal pesh-e-Khidmat hai. mulaahizah farmaaiye aur apnii raaey se navaaziye.
**Ghazal
ye hamne maana ki jaam-e-qismat Khushii se puuraa bharaa nahiiN hai
agar qanaa’at zaraa ho dil meN to zindagaanii meN kyaa nahiiN hai
ye merii Khuu hai ki par jale haiN magar maiN uRtaa hii jaa rahaa huuN
jahaaN meN itne sitam uThaa kar vagarnah koii jiyaa nahiiN hai
maiN tere qadmoN meN jaan duuNgaa magar ye sar maiN na Kham karuuNgaa
tu mera mohsin hai maine maanaa magar tuu meraa Khudaa nahii Nhai
nazar meN jaaduu, badan meN bijlii, har ik adaa laa-javaab inkii
agar haseenoN meN kuchh nahiiN to, bas ik zaraa sii wafaa nahiiN hai
zaraa jo himmat se kaam loge to Gham se ik din nijaat hogii
sharaab meN tum sukuuN na DhuuNDo, ye ranj-o-gham kii dawaa nahiiN hai
ye shahr teraa tujhe mubaarak, mujhe to jaanaa hai gaaoN apne
mirii tabee’at hai jis kii aadii, yahaaN vo taazah hawaa nahiiN hai
kisii ke dil ko agar dukhaanaa, to ye maquulah bhii yaad rakhnaa
ye aisaa sheeshaa hai TuuT kar jo kisii tarah phir juRaa nahiiN hai
mujhe miTaa kar ke jaane vaale, rahe salaamat, jahaaN rahe tuu
nahiiN hai ik pal ki jismeN dast-e-duaa hamaaraa uThaa nahiiN hai
abhii se ulfat ke pech-o-Kham ko tuu Khaak ‘Waseem’ samajh sakegaa
abhii junuuN kii bulandiyoN se zameen par tuu giraa nahiiN hai !!!
Waseem Ahmed**
khair hum kia or humari masrofiyat kia