Aa kisi shaam kisi yaad ki dehleez pe aa
Umer guzri tujhe dekhe huwe, behlaaye huwe
Yaad hai?
Hum tujhe dil maante thay
Apne seenay mein machalta huwa ziddi bacha
Tere har naaz ko ungli se pakar kar aksar
Nit naye khwaab ke bazaar mein le aatay thay
Tere har nakhre ki farmaish per
Aik jeevan ke tamannaon ki benaee se
Hum dekhte thakte hi na thay
Sochtay thay
Aik chota sa naya ghar
Naya mahool, muhabbat ki fiza
Hum donoo
Aur kisi baat per takeyoon se laraaee apni
Phir laraee mein kabhi hanste huwe ro parna
Aur kabhi rote huwe hans parna
Aur thak haar ke gir parne ka masoom khushi baksh khayal
Yaad hai?
Hum tujhe sukh jaantay thay
Raat hans parti thee be-sakhta darshan se tere
Din teri doori se ro parta thaa
Yaad hai?
Hum tujhe jaan kehtay thay
Teri khamoshi se hum mar jaatay
Teri awaaz se ji uth’te thay
Tujh ko choo lene se ek zindagi aajati thee shareyanoo mein
Thaam lene se koi shehar sa bas jaata thaa weraanoo mein
Yaad hai?
Hum tujhe milne ke leye
Wakt se pehlay pohanch jaate thay
Aur mulakaat ke baad
Hum bahut dair se ghar aatay tu kehtay ke humein kuch na kaho
Hum bahut door se ghar aaye hain
Is qadar door se aye hain ke shayad hi koi aa paye
Yaad hai?
Hum tujhe bhagwaan samajhte thay magar kufar se dar jate thay
Tere chinn jane ka dar theek se rakhta thaa musalmaan humein
Aa kisi shaam, kisi yaad ki dehleez pe aa
Tere bhoole huwe rastoo pe leye phirta hai emaan humein
Aur kehta hai ke pehchaan humein
Yaad hai?
Hum tujhe emaan kaha karte thay…