Ye naam mumkin nahi rahe’ga,
Muqaam mumkin nahi rahe’ga…
Ghuroor lehje mein aa gaya tou,
Kalaam mumkin nahi rahe’ga…
…
Ye barf mausam jo shehr-e-jaan mein,
Kuch aur lamhe theher gaya tou,
Lahu ka dil ki kisi gali mein,
Qayaam mumkin nahi rahe’ga…
TUM apni saanson se meri saansein,
Alag tou karne lage ho lekin,
Jo kaam aasan samajh rahe ho,
Wo kaam mumkin nahi rahe’ga…
Wafa ka kaghaz tou bheeg jaye’ga,
Bad’gumani ki baarishon mein,
Khaton ki baaten tou khwaab hongi,
Payaam mumkin nahi rahe’ga…
Mein janta hon, mujhe yaqeen hai,
Agar kabhi tu mujhe bhula de,
Tou teri aankhon mein roshni ka,
Qayaam mumkin nahi rahe’ga…
Ye hum muhabbat mein la’taluq se,
Ho rahe hein tou dekh lena,
Dua’en tou khair kon de ga,
Salaam mumkin nahi rahe’ga!!!
