*Na hi manzil milli, na koi aashna, mein bhatakti rahi, safar jaari raha
Umar-e-chand roz ka lamha lamha yahaan mein ne tanha saha garchay bhari raha
Yeh muqaddar ke madd-o-jazar kya kahun? ke mein shashdar rahi, kuch bhi keh na saki
Woh mujhe dekh kar ajnabi ban gaya jo mere rastoon ka pujaari raha
Mujh se poocho nahe tum Khuda ke leye, mein nahe janti muskurahat hai kya
Ke mein jab tak rahi tau mere dais mein aalam-e-wehshat-o-soug taari raha
Na koi aarzoo hai na shikwa gila, yeh bhi acha huwa mera dil bujh gaya
Warna jab tak raha yeh mere wastay mustaqil wajha-e-beqaraari raha
Aisa kyon-kar huwa, sochti rahi, mein dukhoon ke qaffas mein umar bhar rahi
Mein kisay dosh dun ke meri raah mein, mera apna muqaddar shikaari raha
Woh mila tau bhi aankhoon ko ansoo mile, na mila tau bhi hontoon pe aahain raheen
Woh ajjab shaks thaa ke har ek haal mein, wajha-e-be-sabab sougwaari raha …*