***Gau, ke aaj tabeyat sahi nahee per kabhi kabhaar tabeyat ka kharab hojaana beetay dinoo ki yaad dilata hai, woh din ke jab dil har lamha khush raha karta thaa kyo ke woh mere paas na hokar bhi mere saath thee aur mein us se door rehtay huwe bhi us ke dil ki dharkan huwa karta thaa… aah ke aaj woh din, woh beetay lamhay, sirf aur sirf kabhi na khatam hone waaali yaadain ban kar apne naqoosh chor gaye hain …
Kuch aise hi khayalaat mein dooba Aitbaar Sajid ka yeh khoobsurat kalaam aap sab ki nazar…***
**
‘Kal aur aaj’**
*
Gau mera haafza itna acha nahee
Lekin, bachpan aur larakpan ki bahut saari baatain
Mujhe bahut achi tarah yaad hain
Ghar ki weerani aur akelepan se ghabra kar
Darwaze mein aa kar bethne
Aur gali mein ate jate logoon ke chehre taktay rehna
Bahut sukh deta thaa
Aaj bhi jab bahut akela hojaata hoon
Tu ghar ke darwaze mein aa beth’ta hoon
Ate jate logoon ke chehre bhi takta hoon
Lekin bechaini aur barh jaati hai
Yeh tu yaad nahee
Ke mujhe us se muhabbat kab huwi
Albata yeh baat mein bare wusooq se keh sakta hoon
Ke mujhe muhabbat ka shaour aane se pehle
Muhabbat hochuki thee
Aaj bhi meri aankhon ke saamne hai
Apne apne baroon ki nazaroon se chup kar
Sardeyoon ki lambi lambi raatain
Sehan mein bethay bethay
Aur baatain karte guzar dena
Aik dosre ko apni apni saheleyoon aur dostoon ki baatain
Aur shararatoon ke qissay sunaana
Bahane bahane se aik dosre ke hathoon se khelna
Laraee jhagra karna
Aur kisi ke bhi haar jaane per
Khilkhilaa kar hans dena goya mamool thaa
Yeh mamool ab bhi barqaraar hai
Lekin kuch tabdeleyoon ke saath
Ab na tu kisi se chupna parta hai aur na darna
Jab bhi sarma ki lambi raatain aati hain
Sehan mein betha ghantoo
Apne aap se baatain karta rehta hoon
Be-ikhteyaari mein apne hi haathoon ki ungleyaan
Maroorta kaheen gum hojata hoon
Aur phir chaunk uth’ta hoon
Jab aankhoon mein garm garm nami si phailti hai
Aur rukhsaar bheeg jaatay hain
Aise mein daanista aur zabardasti hansne ki koshish
Kitni nakaam aur kitni khokhli hoti hai
Mere ilaawa kisi aur ki samajh mein aana mushkil hai
Aik hi shehar mein rehtay thay
Tu hazaar naraazgi ke bawajood
Aksar sar-e-rah mulaqaat hojaati thee
Aur apni apni ana’oun ki parwah keye baghair
Aapas mein bol parte thay
Lekin ab tu ek muddat huwi
Pehle is ne shehar badla
Aur phir mein ne
Aaj jab kabhi udaasi had se barh jaati hai
Tu deewaana’war ghar se nikal parta hoon
Magar subah se shaam tak
Masroof aur bhare pure raastoon ki khaak chaan ke
Jab waapis laut’ta hoon
Tu khali pan mazeed barh jaata hai
Aur udaasi kuch aur sawa hojaati hai
Pehle jis cheez ke leye bhi dil chaahata thaa
Chahe kitni bhi qeemti ya anmool hoti
Haasil kar liya karta thaa
Kabhi zid kar ke aur kabhi khana na khane ki dhamki de kar
Aur phir fakhar kiya karta thaa
Mizaaj mein hat-dharmi aur zid tu ab bhi waisi hi hai
Lekin hat-dharmi sehne aur zid man’ne waala koi nahee
Dhamki bhi desakta hoon
Lekin dhamki mein aane waala koi nahee
Is ke bawajood
Jo kuch bhi chaaha hai jaise taise haasil kiya hai
Aur duniya ke be-shumaar naimattain muyassir hain
Magar
Woh lamhay jo beet gaye
Aur woh wakt jo guzar gaya
Kahaan se laoon aur kis se maangoon…