**Woh kehti hai ke kya ab bhi kisi ke leye
Laal hari chooreyaan khareed’tay ho… ?
Mein kehta hoon ab kisi ki kalai per
Yeh rang acha nahee lagta
Woh kehti hai ke kya ab bhi kisi ke leye
Anchal ko aakaash likhte ho… ?
Mein kehta hoon ab kisi ke aanchal mein
Itni wus’at kahaan hai
Woh kehti hai ke kya mere baad
Kisi larki se muhabbat huwi hai tumhein… ?
Mein kehta hoon
Muhabbat sirf larki per mushtamil nahee hoti
Woh kehti hai ke janaan
Lehjay mein yeh udaaseyyat si hai kyon… ?
Mein kehta hoon ke titleyoon ne bhi
Mere dukh ko mehsoos kiya hai
Woh kehti hai ke kya
Ab bhi mujhe Bewafa ke naam se yaad karte ho… ?
Mein kehta hoon ke mere nisaab mein
Yeh lafz shaamil hi nahee
Woh kehti hai ke kya kabhi
Mere zikar per ro bhi letay ho… ?
Mein kehta hoon ke meri aankhoon ko
Har waqt ki phuwaar achi lagti hai
Woh kehti hai ke
Tumhari baatoon main itni gehrai kyon hai… ?
Mein kehta hoon ke teri judai ke baad
Mujhe ko yeh aizaaz mila hai **