yeh meri ghazlein yeh meri nazmein tamam teri hikayetein hien
yeh tazkeray teray lutf kay hien yeh shair teri shikayetein hien
yeh sub teri nazar kar raha hoon yeh un zamanon ki saa´tein hien
jo zindagi kay naye safar mien tujhay kisi waqt yaad ayeen
to aik ik harf jee uthay gaa pehan kay anfaas ki qabayeeen
udaas tanhaiyon kay lamhon mien naach uthein gi upsaraayen
mujhay teray dard kay ilaawa, aur dukh they yeh maantaa hoon
hazar gham thay, jo zindagi ki talashh mein they yeh jantaa hoon
mujhay khabar thee,keh teray aanchal mein dard ki rait chaanta hoon
magar her ik baar tujh ko choo kar, yeh rait rang-e-hina bani hai
yeh zakhm gulzaar ban gaye hien, yeh aah-e-sozaan ghata bani hai
yeh dard moj-e-saba howa hain, yeh aag dil ki sada bani hai
aur ab yeh saarii mataa-e-hastii yeh phool ye zaKhm sab terey hain
yeh dukh key nauhey ye sukh ke naghmay jo kal merey they woh ab terey hain
jo terii qurbat terii judaayee mein kaT gayey roz-o-shab terey hain
woh tera shayer, tera mughanni, woh jis ki batein ajeeb si theen
jis kay andaaz khusrwana thay, aur adaa´en ghreeb si theeen
woh jis kay jeenay ki khwahishein bhi khud uss kay apnay naseeb si theen
naa pooch uss ka keh woh deewana, bohat dinon ka ujarr chukaa hai
woh koh-kan to nahin thaa lekin karri chatanon say larrr chukaa hai
woh thak chuka hai, aur uss ka taisha uss kay seenay mien garr chuka hai
(Ahmad Faraz)