wo aankhain kesi aankhain thin…
main ab tak mehv-e-herat hon…
ajab shisha gari thin wo
ajab jadu gari thin wo
badi herat se takte the
ye meri zat ke zarre
ke uski ik nigah-e-khas ne
aisi tajjali ki
ke meri zat jo koh-e-giran thi
reza ho gai
wo aankhain kesi aankhain thin
NA MASJID THIN NA MANDIR THIN
MAGAR PHIR BHI AQEEDAT MAND LOGON NE
UNHAIN ROSHAN KIE RAKHA
UN AANKHON KE DAR-E-TILSAM PAR
JABINAIN UMR BHAR TEKIN
UNHAIN SAJDAH KIE RAKHA
main ab tak meh-e-herat hon
wo aankhain kesi aankhain thin
na khulti thin kisi par bhi
wo aankhain raz thin aisa
ajab tilsam kaddah thin zat main apni
kisi sam sam se kia khultin
asiran-e-mohabat par
wo aankhain door bhi hon to
younhi paband rakhti thin
kashish un dekhi un jani si
youn mehsos hoti thi
koi be nam sa zarra ho jese zat ye meri
wo ik markaz hon iss unjani quwat ka
faqat palkon ki junbish se
wo aankhain khench sakti thin
main ab tak mehv-e-herat hon
wo aankhain kesi aankhain thin
wo aankhain aisa paras thin
agar mitti ko choo jain
to mitti se bane sona
wo aankhain to maseeha thin
har ik bejan se manzar ko kafi he
faqat ik hi nigah-e-naz
ashab-e-dard likhte hain
wo aankhain dekh leti thin
to manzar bol uthte the
MAIN AB TAK MEHV-E-HERAT HON
WO AANKHAIN KESI AANKHAIN THIN…!!!