voh bulaayen to kyaa tamaashaa ho
ham na jaayen to kyaa tamaashaa ho
ye kinaaron se khelane vaale
doob jaayen to kyaa tamaashaa ho
bandaa_parvar jo ham pe guzari hai
hum bataayen to kyaa tamaashaa ho
aaj ham bhi teri vafaaon par
muskuraayen to kyaa tamaashaa ho
teri soorat jo ittefaaq se ham
bhool jaayen to kyaa tamaashaa ho
waqt ki chand sa’aten ‘Sagar’
laut aayen to kyaa tamaashaa ho
~~~~
Sagar Siddiqui
~~~~**~~~~