vo subah kabhee to aye gi
in kaali sadyoN ke sar se jab raat ka aaNchal dhalke gaa
jab dukh ke baadal pighale.nge jab sukh kaa saagar jhalakegaa
jab ambar jhoom ke nache ga jab dharti naghme gaye gi
vo subah kabhee to aye gi
jis subah ki Khaatir jug jug se ham sab mar mar ke jeete haiN
jis subah ke amrit ki dhun meiN ham zahar ke pyale peete haiN
in bhooki pyaasi roohoN par ik din to karam faramayegi
vo subah kabhee to aye gi
maana ke abhi tere mere aramaanoN ki qeemat kuchh bhi nahiN
miTTi ka bhi hai kuch mol magar insaanoN ki qeemat kuch bhi nahiN
insaanoN ki izzat jab jhooThe sikkoN meiN na toli jaayegi
vo subah kabhee to aye gi
daulat ke liye jab aurat ki ismat ko naa bechaa jayega
chaahat ko na kuchla jayega, izzat ko na bechaa jayega
apni kaali karatootoN par jab ye duniya sharmaye gi
vo subah kabhee to aye gi
beeteiN ge kabhi to din aaKhir ye bhook ke aur bekaari ke
TooTeiN ge kabhi to but aaKhir daulat ki ijaaradaari ke
jab ek anokhi duniya ki buniyaad uThaai jaayegi
vo subah kabhee to aye gi
majboor buRhaapa jab sooni raahoN ki dhool na phaNke ga
masoom laRakapan jab gandi galiyon mein bheek na maaNge ga
haq maaNgane waaloN ko jis din suli na dikhai jayegi
vo subah kabhee to aye gi
faaaqoN ki chitaoN par jis din insaN na jalaye jaayeNge
seene ke dehakte dozakh meiN aramaa.N na jalaaye jaaye.nge
ye narak se bhi gandi dunya, jab swarg banai jaayegi
vo subah kabhee to aye gi
jis subah ki Khaatir jug jug se ham sab mar mar ke jeete haiN
jis subah ke amrit ki dhun meiN ham zahar ke pyaale peete haiN
vo subah na aaye aaj magar, vo subah kabhi to aayegi
vo subah kabhee to aye gi
