**aadaab, dosto!
ek nazm pesh-e-Khidmat hai. mulaahizah farmaaiye aur bataaiye ki kaisii lagii. navaazish hogii. **
“vahiiN le chal”
mire rahbar! mujh ko itnaa bataa, kyaa aisii dunyaa bhii hai kahiiN?
jahaaN ranj-o-alam maujuud na hoN, jahaaN sirf Khushii hii bastii ho
jahaaN aah na ho, jahaaN ashk na hoN, hoNToN se haNsii hii barastii ho
jahaaN nuur-o-tajallii qaid na hoN kuchh mahloN aur aivaanoN meN
jahaaN roz chiraaGh-e-shaam jale iflaas ke zulmat.KhaanoN meN
jahaaN bhuuk se haaraa tifl koii kashkol na thaame haathoN meN
jahaaN peT kii Khaatir jismoN kaa hotaa na ho saudaa raatoN meN
jahaaN roTii kii Khaatir dar dar maare maare phirnaa na paRe
jahaaN chhoR ke apnoN kii qurbat, GhairoN se kabhii ghirnaa na paRe
jahaaN sirf muhabbat raaij ho, nafrat kaa kahiiN bhii naam na ho
jahaaN sab mil jul kar rahte hoN, jhagRoN se kisii ko kaam na ho
jahaaN amn-o-sukuuN qaaim hoN sadaa, jahaaN raaj na ho haivaanoN kaa
jahaaN zaat-o-qabeele kii Khaatir bahtaa na ho KhuuN insaanoN kaa
gar hai to vahiiN le chal mujh ko, is dunyaa se jee uub gayaa!
ik bahtar kal kii aas kaa dhuNdlaa taaraa bhii ab Duub gayaa!!
**
Waseem Ahmed**
