**
Darmeyaan mere us ke khwaab ki musaafat thee
Yeh magar hakeekat hai us ko meri chaahat thee
Darmeyaan bichay thay jo faasilay safar jaisay
Woh bhi kuch raqeeboon ki baahami siyasat thee
Khubaroo balaa ka thaa, chaand jaisa chehra thaa
Chaal hirneyoon jaisi aur bhi qayyamat thee
Mein ne jis ko dekha thaa maatami nigahoon se
Us ke shokh lehjay mein kis qadar sharaarat thee
Bewafa sa lagta thaa dekhne mein woh lekin
Aankh mein nami aana pyar ki alaamat thee
Us ke baad mein us ko phir kabhi nahee bhoola
Jis ke yaad aane ki sirf ek saa’at thee
Mere chairh dene per us ka sirf ‘Naa’ kehna
Us ke phool lehjay mein kis qadr halaawat thee
Us ne mujh ko chaaha thaa toot kar ‘Raza’ lekin
Saath umer bhar rehtay … iski kab zaamanat thee …
**