**Us ke nazdeek gham-e-tark-e-wafa kuch bhi naheiN
mutmain aesa hey wo jesey huwa kuch bhi **naheiN
**
ab to haathoN sey lakeereiN bhi miti jaati heiN
us ko kho kar to merey paas raha kuch bhi **naheiN
**
chaar din reh gaey meiley meiN magar ab ke bhi
us ney aaney ke leeye khat meiN likha kuch bhi **naheiN
**
kal bicharrna hey to phir ehd-e-wafa soch ke baandh
abhi aaghaaz-e-mohabbat hey, gaya kuch bhi **naheiN
**
meiN to is waastey chup hooN ke tamaash na baney
tu samajhta hey mujhey tujh sey gila kuch bhi naheiN
**
aey Shumaar aaNkheiN isi tarha bichaaey rakhna
jaaney kis waqt to aa jaey, pata kuch bhi naheiN!
