Ehd-e-guzashta ke do chaar umr-raseeda lamhey
jab kabhi dil ke boseeda sey darwaazey ko
kap’kapaatey huwey haathoN sey khat’khataatey heiN
to sehan-e-zehan meiN madfoon bohat si yaadoN par
jesey ik pal meiN qayaamat si guzar jaati hey
Dar wa hotey hi ye do chaar umr-raseeda lamhey
girtey parrtey huwey, dil ke aalam sey jhijaktey huwey
chaley aatey heiN ye duhraatey huwey ke ik zamaana tha
aaj sannaattoN sey sarsaraata huwa ye puraana khandar,
ik zamaaney meiN hamaara chamkta huwa aashyaana tha!
Laakh samjhaata hooN ke ye maatam-saraai janey do
yaad-e-maazi ke mit’tey huwey naqsh-o-nigaar
khaak-e-maazi meiN dabey heiN, to dabey rehney do
meri shikastagi ke parcham, merey hosloN ke saleeb
lehd-e-mohabbat pe garrey heiN, to garrey rehney do
par jab bhi zehan ke thakey huwey shaanoN par
aa ke theharta hey kisi yaad ka dast-e-shafeeq
to aas ka doshaala kabhi yaas ka taazyana leeye
ye ehd-e-guzashta ke do chaar umr-raseeda lamhey
aa hi jaatey heiN koi na koi bahaana leeye!
Nice 1 Amal g!
Main zara suggestions dene ki jasaarat karne laga hoon:(
Aap ki nazm k is misre “Jaise ik pal mein qayaamat c guzar jaati hai” ko base bana kar main ne aap ki nazm mein kuch bisaat bhar tabdiliyaan ki hain, mujhe yehi misra wazan k lehaaz se nazm ka markaz laga tha.
Umr-Raseeda Lamhe
Ehd-e-rafta k ye kuch umr-raseeda lamhe
Jab kabhi qalb k boseeda se darwaaze ko
Kapkapaate hue haathon se khat-khataate hain
To sehn-e-zehn mein madfoo(n) bohat c yaadon par
Jaise ik pal mein qayaamat c guzar jaati hai
Dar k wa hote hi ye umr-raseeda lamhe
Dil k aalam se jhijakte hue, girte parrte
Aa k dohraate hain phir se k ik zamaana tha
Aaj sannaatton mein liptta ye puraana khanddar,
(Jagmagaata sa, chamakta hua roshan roshan)
Ik zamaane mein hamaara ye aashyaana tha!
Laakh kehta hoon ye maatam hai sitam, jaane do
Yaad-e-maazi k ye mitt-te hue pur-dard nuqoosh
Khaak-e-maazi mein dabe hain, to dabe rehne do
Meri har haar k parcham, ye hauslon ki saleeb
Lehd-e-ulfat mein garre hein, to garre rehne do
Jab bhi is zehn k shal hote hue shaanon par
Aa theherta hai kisi yaad ka dast-e-mushfiq
Chaadar-e-aas, kabhi yaas-e-zamaana le kar
Ehd-e-rafta k ye kuch umr-raseeda lamhe
Aa hi jaate hain koi aur bahaana le kar !
