Dil ki jo baat qareenay say kahi jati hai
Gosha-e-Dil may mukhatib ki jaga pati hai
Kash uRtay huay lamhat kay par kat saktay
Umr panchi ki tarah hai kay uRi jati hai
Ham nay har zakhm saha teri khushi ki khatir
Zindagi! terey ravayyon pe hansi ati hai
Daykhta hai yahan har shaks hi auron ki taraf
Apnay ehvaal par kab kis ki nazar jati hai
Khuaab-e-avara ki soorat hai yeh khuab hasti
Umr dhalti hai to yeh baat samajh ati hai
Zehen yaksoo ho to khulti hai rah-e-fikr-e-sakhn
Phir kisi dhab say koi baat kahi jati hai
Shafiq-ur-Rehman Shafaq.
