Aik Bay’baak Si Nazm,
Vo Subah Kabhi To Aye Gi
In Kaali Sadiyo’n Ke Sir Se Jab Raat Kaa Aanchal Dhal’kega
Jab Dukh Ke Baadal Pighlaingay Jab Sukh Ka Saagar Jhal’kega
Jab Amber Jhoom Ke Naache Ga Jab Dharti Naghme Gaye Gi
Vo Subah Kabhi To Aye Gi
Jis Subah Ki Khaatir Yug Yug Se Hum Sab Mer Mer Ke Jeetay Hain
Jis Subah Ke Amrit Ki Dhun Main Hum Zeher Ke Piyaale Peetay Hain
In Bhooki Pyaasi Rooho’n Per Ek Din To Karam Farma’ay Gi
Vo Subah Kabhi To Aye Gi
Maana Ke Abhi Tere Mere Aramaanon Ki Qeemat Kuch Bhi Nahin
Mitti Ka Bhi Hai Kuch Mol Magar Insaanon Ki Qeemat Kuch Bhi Nahin
Insaanon Ki Izzat Jab Jhootay Sikko’n Main Na Toli Jaye Gi
Vo Subah Kabhi To Aye Gi
Daulat Ke Liye Jab Aurat Ki Ismat Ko Na Bechaa Jaye Ga
Chaahat Ko Na Kuchla Jaye Ga, Izzat Ko Naa Bechaa Jaye Ga
Apni Kaali Kertooto’n Per Jab Ye Duniya Sharmaye Gi
Vo Subah Kabhi To Aye Gi
Beetain Ge Kabhi To Din Aakhir Ye Bhook Ke Aur Bekaari Ke
Tootain Ge Kabhi To Bu’tt Aakhir Daulat Ki Ijaaradari Ke
Jab Aik Anokhi Duniya Ki Bun’yaad Uthaaii Jaye Gi
Vo Subah Kabhi To Aye Gi
Majboor Burhapa Jab Sooni Raaho’n Ki Dhool Na Phaa’nkay Ga
Masoom Larak’pan Jab Gandi Galiyon Main Bheek Na Maange Ga
Haq Maang’nay Waalon Ko Jis Din Sooli Na Dikhai Jaye Gi
Vo Subah Kabhi To Aye Gi
Faaqo’n Ki Chita’on Per Jis Din Insaan Na Jala’ain Jayen Ge
Seenay Ke Dehektay Dozakh Main Armaa’n Na Jala’ain Jayen Ge
Ye Nerg Se Bhi Gandi Duniya, Jab Swerg Banai Jaye Gi
Vo Subah Kabhi To Aye Gi
Jis Subah Ki Khatir Jug Jug Se Hum Sab Mer Mer Ke Jeetay Hain
Jis Subah Ke Amrit Ki Dhun Main Hum Zeher Ke Pyaale Peetay Hain
Vo Subah Na Aaye Aaj Magar, Vo Subah Kabhi To Aye Gi
Vo Subah Kabhi To Aye Gi
(Sahir Luhyanvi)
Umeed Hai Aap Logon Ko Pasand Aye Gi..
Regards,
