Aik Ghazal,
Tuu Mujhay Marghoob Hai, Lekin Mera Haasil Nahi
Ek Musalsal Rehguzar Hai, Zindagi Manzil Nahi
Kashtion Main Bethnay Walay Ye Pehle Soch Lain
Duur Tak Gehra Samander Hai Kaheen Sahil Nahi
Inn Darakhton Aur Parindon Ko Duaa Deti Hoon Main
Warna Baish-Az-Yak Qafas Dunya-ay Aab-o-Gul Nahi
Aashqi Laila Ke Chehray Per Hai Ruswai Ki Aanch
Aag Ke Sehra Main Koi Reshmi Mehmil Nahi
Khokhlay Alfaaz Deemak Hain Rawabit Ke Leay
Dil Nahi Milta To Mat Ker Baat, Mujh Se Mil Nahi
Kia Sabab Hai Aaj Ki Shab Wasl Main Rahat Nahi
Main Sarapa Jaan Nahi Ya Tuu Sarapa Dil Nahi
Ay Zameen Kin Aasmanon Ke Talay Tuu Aa Gai
Khoon Ka Darya Rawaan Hai Aur Koi Qaatil Nahi
Itna Sannata Zameen Per, Khud Khuda Hairaan Hai
Uss Ke Saaray Darr Khulay Hain, Aur Koi Saa-il Nahi
(Bushra Rehman)
Umeed Hai Aap Logon Ko Pasand Aye Gi..
Regards,