muhabbat ki tabiyat meN
yah kaisa bachpana qudrat ne rakhha hai
ke jitni puraani jitni bhi mazbuut ho jaaye
isse taayeed-e-taaza ki zaruurat phir bhi rahti hai
yaqeen ki aakhri had tak diloN meN lahlahaati ho
nigaahoN ki aakhri had tak diloN meN jagmagaati ho
hazaaroN tarah se dil.kash hasiN haale banaati ho
isse izHaar ke lafzoN ki haajat phir bhi rahti hai
mohabbat maangti hai yuuN gawaahi apne hone ki
ke jaise tifl-e-saada shaam ko ik beej boye
aur shab meN baar.Ha uThe
zameeN ko khod kar dekhe
ke pauda ab kahaaaN tak hai
mohabbat ki tabiyat meN ajab takraar ki khuu hai
ke yah iqrar ke lafzoN ko sun.ne se nahiN thakti
bicharhne ki gharhi ho ya koi milne ki sa’at ho
isse bas aik hi dhun hai
kaho mujh se mohabbat hai
kaho mujh se mohabbat hai
kuchh aisi besakuuni hai wafaa ki sar-zameenoN meN
ke jo ahl-e-muhabbat ko sadaa bechain rakhtihai
ke jaise phool meN khushbu ke jaise haath meN taara
ke jaise shaam ka taraa
mohabbat karne waaloN ki sahar raatoN meN rahti hai
gumaaN ki shaakhoN meN aashiyaaN banta hai ulfat ka
yah ain wasl meN bhi hijr ke khadshoN meN rahti hai
muhabbat ke musaafir zindagi jab kaaT chukte haiN
thakan ki kirchiyaaN chunte wafa ki ajrakeN pahne
samay ki raaH.guzar ki aakhri sarHad pe rukte haiN
to koi doobTi saansoN ki Dori thaam kar
dhheere se kahta hai
ke yah sach hai na
hamaari zindagi ik doosre ke naam likhi hai
dhhundhlaka sa jo aankhoN ke qareeb-o-door phaila hai
issi ka naam chaahat hai
tumhe mujh se muhabbat hai
tumhe mujh se muhabbat hai
muhabbat ki tabiyat meN
ajab ik bachpan qudrat ne rakhha hai.
