Tumhari yaad aati hai
Andheri raat ko jab aasmaN per
Tajj’aliaN harfe mohabbat naqsh kerti haiN
Kisi nakam sa’at jab
Hamara dil shikasta hosle ka noha gata hai
Naee hijrat hamari zindagi ki taza majboori ke aNgan main
Siyah khaima lagati hai
Tumhari yaad aati hai
Tumhari yaad aati hai
Kabhi be abaad sarkoN ke kinaroN per
Kabhi maqtool jazboN ke mazaroN per
Kabhi banjar zameenoN per
Kinare shab zameeeN main dafn hote hue
Raishmi suraj ki halat ke ishare per
Judai ke kinare per
KaheeN mausam badal jaey
Kabhi jo saaz mil jaey
Kabhi jo geet ban jaey
Kabhi saNgeet chin jaey
Mohabbat saaz lamhoN main
Bohat naraz lamhoN main
Zamane ke sawaloN main
Hifazat ke khyaloN main
Tumhari yaad aati hai
Jab aadhe raste per ja ker manzil bhool jati hai
Tumhari yaad aati hai