aadaab, dosto!
ek haaliya Ghazal pesh hai. mulaahizah farmaaiye aur apnii raae se navaaziye.
**Ghazal
tumhaarii yaad kii sham.eN jo ham jalaate rahe
andhere dard ke ghir ghir ke dil meN aate rahe
tire Khayaal se roshan the mere qurb-o-javaar
sitaare raat bhar aaNkhoN meN jagmagaate rahe
shab-e-firaaq bitaane ko kuchh to karnaa thaa
hisaab un kii inaayaat kaa lagaate rahe
shikastah ho hii gayaa sheesha choT khaa khaa kar
Ghazab kiyaa ki jo patthar se dil lagaate rage
hamaare ishq kaa andaaz bhii niraalaa thaa
ki zaKhm khaate rahe, aur muskuraate rahe
safar tamaam dar-e-yaar hii pe aa ke huaa
qadam hazaar sar-e-raah Dagmagaate rahe
Tale na apne usuuloN se ham kabhii, yaaro!
taqaaza.haa-e-Gham-e-dahr aazmaate rahe
kisii ke qurb kii :Waseem: talab thii aisii kuchh
ki ham jahaaN kii har ik shai se duur jaate rahe !!!
Waseem Ahmed**
