salaam dosto,
ummeed hai k mizaaj-e-giraamii baKhair hoNge.
mundarja baalaa Ghazal moHtaram janaab Dr. Kaleem “Aajiz” kii hai. is Ghazal kaa ek taareeKhii pas manzar bhii hai jo nihaayat aham hai. 1975 meN jab Indira Gandhi ne mulk meN Haalat-e-hangaam [emergency] naafiz kii to har qism kii ziyaadtiyaaN vujood meN aane lagiiN, insaanii Huqooq kii paamaalii huii. usii saal yaum e aazaadii ke din laal qil’a par ek mushaa’ira huaa jis meN Indira Gandhi bhii meHmaan e Khusoosii thiiN…Kaleem saaHab marHoom kii jab baarii aayii to unhoN ne Indira Gandhii kii taraf ishaarah kar ke yeh Ghazal paRhii…India Gandhii ne bahot ta’reef kii aur qat’an buraa nahiiN manaayaa…yeh shaayad ek achchhe siyaasat daaN kaa zarf hotaa hai k vo sab kuchh bardaasht kar jaaye.
to, Ghazal mulaaHizah farmaaiye.
faqa6t Khaak_nashiiN,
_______KKF
**
mere hī lahū par guzar-auqāt karo ho
mujh se hī amīroñ kī tarah baat karo ho
**
**din ek sitam ek sitam raat karo ho
vo dost ho dushman ko bhī tum maat karo ho
****ham ḳhāk-nashīñ tum suḳhan-ārā-e-sar-e-bām
paas aa ke milo duur se kyā baat karo ho
****ham ko jo milā hai vo tumhīñ se to milā hai
ham aur bhulā deñ tumheñ kyā baat karo ho
****yuuñ to kabhī muñh pher ke dekho bhī nahīñ ho
jab vaqt paḌe hai to mudārāt karo ho
****dāman pe koī chhīñT na ḳhanjar pe koī daaġh
tum qatl karo ho ki karāmāt karo ho
****bakne bhī do ‘ājiz’ ko jo bole hai bake hai
dīvāna hai dīvāne se kyā baat karo ho **