Tujh se roothe to kayee roz na khud se bole
baar-haa teri hi yaadon ke dareeche khole
hum ne is baihr-e-gham-o-kaif mein kya kuchh na kiya?
kabhi toofaan uthaaye, kabhi moti roley!
zauq-e-parvaaz hi kaafi tha urhaanon ke liye
na kabhi pankh hilaaye na kabhi par tole!
too bhi khaamosh hai, tasveer bhi teri khaamosh
koi to baat kare, koi to mujh se bole!
aaj ki raat to jee bhar ke hamen rona hai
jis ko sona hai, barhe shauq se jaaye, so le
mere baare mein bhalaa maut ka manshaa kya hai?
sochti hai ke “woh aaye, mira ghoonghat khole”!
meri taufeeq bhi kam hai, miri auqaat bhi kam
kya zaroori hai ke woh aankh ‘mujhi’ ko tole?
hum agar tujh pe fidaa hain to barhi baat hai kya?
dekh le tujh ko to bhagwaan ka bhi man dole!
jis ke daaman pe numaayan hon gunah ke dhabbe
meri maane to unhen ashk bahaa kar dho le!