آنکھ الُجھی ،سوچ ویراں آئنے کے سامنے
کر گیا وہ مُجھ کو حیراں، آئنے کے سامنے
کر رہے تھے جب رفُو سب اپنا اپنا پیرہن
میں کھڑاتھا چاک داماں آئنے کے سامنے
رُوبرُو مُشکل ہُوا اُس کو بتانا حالِ دل
لگ رہا تھا کتنا آساں آئنے کے سامنے
ایک میں بے چہرگی اوڑھے ہُوئے، بے ننگ و نام
ایک وہ آئنہ ساماں، آئنے کے سامنے
آزاد تھا کہ جب تلک دُنیا کھڑی تھی سامنے
میں کھڑا تھا پا بجولاں، آئنے کے سامنے
دیکھ کر مُجھ سا ہی چہرہ،میرے جیسے خدوخال
ہو گیا وہ بھی پریشاں، آئنے کے سامنے
خار لپٹے پاؤں سے،سُورج لئے سر پر کئی
وہ کھڑا تھا گُل بداماں، آئنے کے سامنے
دل کے شیشے میں تراجو عکس کب سے قید تھا
آگیا بر نوکِ مژگاں، آئنے کے سامنے
آج یوں بکھرے صبا، جُوں کرچیاں ہوں خواب کی
جو کئے تھے عہد و پیماں، آئنے کے سامنے
…Ab kia karon…?