موسم کرب انتظار بھی جھوٹ
دل نہ مانے تو وصل یار بھی جھوٹ
جھوٹ ہے سب خزاں کا خمیازہ
عکس رنگ رخ بہار بھی جھوٹ
موت تیری طالب بھی لغزش ہے
زندگی ،تیرا اعتبار بھی جھوٹ
وسعت داستاں شوق غلط
کوشش حرف اختصار بھی جھوٹ
خلقت شہر مصلحت پیشہ
ورنہ فرمان شہر یار بھی جھوٹ
نارسائی کو راستے مشکل
کور چشمی کو کوہسار بھی جھوٹ
دور سے پیاس کو سراب چناب
اھل صحرا کو آبشار بھی جھوٹ
پیرہن خون دل سے تر کر لو
ورنہ دامان تار تار بھی جھوٹ
صرف اس کا سفر ہے سچ محسن
میری راہ بھی میرا غبار بھی جھوٹ