غزل - جب پیرایہء اظہار بدل جاتا ہے

sfaseehrabbani · December 16, 2012, 6:12am

جب بھی پیرایہء اظہار بدل جاتا ہے
ساتھ مفہوم بھی اے یار بدل جاتا ہے

جانے سیکھا ہے یہ انداز کہاں سے اس نے
ایک لمحے میں کئی بار بدل جاتا ہے

اب پذیرائی کہیں بھی نہیں ہوتی سچ کی
اب تو منصور سرِ دار بدل جاتا ہے

ایسا ہوتا ہے کہ لگ جاتی ہے ٹھوکر مجھ کو
اور پھر وقت بھی رفتار بدل جاتا ہے

یہ ضروری تو نہیں روز نئی خبریں ہوں
“صرف تاریخ سے اخبار بدل جاتا ہے”

عرض ہے آپ بھی اب مجھ پہ عنایت کیجے
توبہ کرنے سے گنہگار بدل جاتا ہے

چند لمحوں کو ہوائیں کبھی برہم ہو جائیں
منظرِ کوچہ و بازار بدل جاتا ہے

رازداں جان کے کہ دیتا ہوں باتیں جس سے
رخ وہی جانبِ اغیار بدل جاتا ہے

آپ کہتے ہیں تو یہ آپ کی ہے سوچ مگر
ہم نہ مانیں گے کبھی پیار بدل جاتا ہے

مجھ سےرخ پھیر کےچل دیتا ہےسورج توفصیح
ساتھ ہی سایہء دیوار بدل جاتا ہے

Azad · January 18, 2013, 7:02am