Kinaray pe khara hun aur darya paar karna hai,
Maine abhi apne liye koi gharra tayar karna hai.
Tumhare wastay mumkin nahin is raah par chalna,
Tumhain koi munafa bakhsh karobar karna hai.
Dhandora peetna hai us ne apni nek nami ka,
Khabar choti si hai magar usay akhbar karna hai.
Irada hi nahin karna abhi tark-e-talluq ka,
Jo karna hai to baad az koshish-e-basyar karna hai.
Nikalta hai kahan is main koi ta’ameer ka pehloo,
Tera maqsad dilon ke darmyan deewar karna hai.
Ajab ek khouf mehsoos hota hai kayi din se,
Achanak hi mere saaye ne mujh pe war karna hai.