Tahraa huaa manzar hai k maatam hai nazar ka...merii ek Ghazal

KKF · February 15, 2011, 1:51am

**salaam dosto,

aaj apnii ek aur Ghazal le kar Haazir-e-Khidmat huaa huN is ummeed-e-qawii k saath k aapkii tab’a-e-naazuk pe baar-e-giraaN guzregii. aapkii aaraa o tanqeed o tanqees kaa shiddat se intizaar rahegaa…to, Ghazal mulaaHizah farmaaiye:

faqat Khaak_nashiiN
_______Hashmat

ik mauj-e-balaa_khez samandar se uThii hai
saaHil pe vohii chiiz jo paanii meN dabii hai

mehtaab kii kirnoN se sadaa phooT ke niklii
ghabra ke uThaa huN ki zamiiN TuuT rahii hai

sab kuchh hai usii tarHa, vohii faasle kal ke
ma’luum nahiiN aaj bhi kia ham meN kamii hai

uRtaa hua guzraa huN sar-e-jaada-e-asraar
ik khowaab kii duNyaa meN mirii aaNkh khulii hai

dekha jo bulandii se to manzil ka dhuaaN thaa
chaTTaan se utraa huN to diivaar khaRii hai

Tahraa huaa manzar hai k maatam hai nazar ka
jo 'aks hai aaNkhoN meN jali hai na khafii hai

maazii ne use “Sai’hbaa!” teh-e-khaak kiyaa hai
taKhtii jo mire 'ahd kii marqad pe lagii hai

shukria
**

ghazal_kisi_ke · February 15, 2011, 5:32am

Re: Tahraa huaa manzar hai k maatam hai nazar ka…merii ek Ghazal

3 and 5 :k:

Amal · February 15, 2011, 2:11pm

Re: Tahraa huaa manzar hai k maatam hai nazar ka…merii ek Ghazal

[quote=““Khalil KhaaN FaaKhta””]

mehtaab kii kirnoN se sadaa phooT ke niklii
ghabra ke uThaa huN ki zamiiN TuuT rahii hai

sab kuchh hai usii tarHa, vohii faasle kal ke
ma’luum nahiiN aaj bhi kia ham meN kamii hai

uRtaa hua guzraa huN sar-e-jaada-e-asraar
ik khowaab kii duNyaa meN mirii aaNkh khulii hai

dekha jo bulandii se to manzil ka dhuaaN thaa
chaTTaan se utraa huN to diivaar khaRii hai

maazii ne use “Sai’hbaa!” teh-e-khaak kiyaa hai
taKhtii jo mire 'ahd kii marqad pe lagii hai

**
[/quote]

Khalil bhai aap ki tehreeroN meiN aap ke walid-e-marhoom aur aap ke mehboob shaer Janab Ashgar Gondhvi sahab ki jhalak dikhaai deti hey. Bohat khoob k:

GuL-e-Tasbeeh · February 15, 2011, 5:01pm

Re: Tahraa huaa manzar hai k maatam hai nazar ka…merii ek Ghazal

Good achi ghazal hai.. mujhey Nazm ziyaada pasand haiN :-d Next Nazm kab likh rahey haiN … aur haaN har jagah aik ID kyuN nahiN banatay aap

fara · February 15, 2011, 6:33pm

Re: Tahraa huaa manzar hai k maatam hai nazar ka...merii ek Ghazal

Zabardast ghazal hay... lekin Gul ki terhaaN mujhay bhee nazamaaiN pasaand hain...

Aap buhat khoob likhtay hain... Bus ji fakhti nay apko kiya say kiya ker dala...

UZ · February 15, 2011, 6:36pm

Re: Tahraa huaa manzar hai k maatam hai nazar ka…merii ek Ghazal

Nice one KKF :k: Especially sher no.5

_Masoom_Muskaan · February 16, 2011, 12:57pm

Re: Tahraa huaa manzar hai k maatam hai nazar ka…merii ek Ghazal

UZ · February 16, 2011, 6:57pm

Re: Tahraa huaa manzar hai k maatam hai nazar ka...merii ek Ghazal

aap ko kya KKF ke ashar ney rula diya ;)

_Masoom_Muskaan · February 16, 2011, 10:13pm

Re: Tahraa huaa manzar hai k maatam hai nazar ka…merii ek Ghazal

samj ae hi nai

KKF · February 21, 2011, 12:33am

Re: Tahraa huaa manzar hai k maatam hai nazar ka…merii ek Ghazal

aapkaa beHad shukria k aapne jis ash’aar ko pasand farmaayaa uskii nishaan-dehii farmaayii…aapkii Hausalah afzaaii ke liye mamnoon o mutashakkir huN

aji aapkaa yeh Husn e nazar hai varna “cheh piddii cheh piddi kaa shorbaa” waalii misdaaq mujh per laagoo hotii hai Hausalah afzaaii ke liye shukria

**shukria, mahrbaanii, navaazish, karam…aapkii Hausalah afzaaii mere liye mash’il-e-raah hai. ji, mujhe is baat kaa 'ilm hai k aapko nazam ziyaada pasand hai magar kia karuuN mujhe Ghazaliyaat se ziyaada dil-chaspii hai…aapkaa Hukm sar aanKhoN pe, inshaa Allah jald hii ta’meel-e-Hukm hogii.

aapne bhii to ID naii banaayii huii hai… jo Haal “ai’n” kaa hai vohii soorat “Ghai’n” kii bhii hai bas nukte kaa farq hai… pasandeedgii ke liye ek baar phir banda mutashakkir hai :)**

**aaaaaaaaaawwwwwwww…lekin, aajkal to aap par bhii rang-e-Ghazal chhaayaa huaa hai bal k yuN kahuuN to be-jaa na hogaa k:

tire sar pe kuchh is andaaz se ash’aar kaa girnaa****
nazam uR gaii, Ghazaliyaat par saHaab aayaa

kaash “FaaKhtii” na uRtii to aaj aap logoN ko merii Ghazaliyaat paRh ke yeh din na dekhne ko milte hehe :D**

**waah, aapko bhii 5 numbarii she’r hii pasand aayaa jo mujhe bhii ittifaaqan pasand hai … thankoo
**

**muskuraate huye rona seekho:

haNste haNste rona seekho
rote rote haNsnaa seekho

thankoo :D**

inko to eid bhii rulaa jaatii hai vo inke paas aate hii ro paRtui hai aise hehe