**aadaab, dosto! **
ummeed hai aap sab Khairiyat se hoNge.Ek Ghazal aap sab kii Khidmat meN pesh hai. aap kii aaraa kaa intizaar rahegaa.
**
Ghazal
sunte haiN ki har shai meN haiN anvaar-e-muhabbat
ho jaaye kabhii ham ko bhii deedaar-e-muhabbat!
dekho ye mirii aaNkh ka dhokaa hai ki sach hai
dikhne to lage haiN mujhe aasaar-e-muhabbat
ujlat meN ye pur.lutf safar Khatm na ho jaaye
bahtar hai ki dheemii rahe raftaar-e-muhabbat
aaqil ko aseerii ke taqaaze kahaaN manzuur!
naadaan hii hotaa hai giriftaar-e-muhabbat
pahle to har ik baat bigaR jaatii hai, yaaro!
aate haiN zaraa der se atvaar-e-muhabbat
yuuN lagne lagaa, aaj to har kaam hai mumkin
maiN ne jo kiyaa yaar se izhaar-e-muhabbat
mere dil-e-deevaanaa kii hasrat bhii nikal jaaye
jhuuTaa hii sahii, kar leN vo iqraar-e-muhabbat!
darkaar hai KhuuN qalb kaa taz.een ko is kii
khiltaa nahiiN varnaa kabhii gulzaar-e-muhabbat
har shaKhs hai is jazba-e-fitrii kaa muKhaalif
ik ham haiN zamaane meN tarafdaar-e-muhabbat
rusvaa bhii hue, vasl kii lazzat bhii na paayii
naahaq hii bane ham to gunah.gaar-e-muhabbat
marte haiN magar zaKhm pe marham nahiiN rakhte!
:Waseem: haiN ajab log ye beemaar-e-muhabbat !!!
Waseem Ahmed**
