Ba’naam-e-Watan
Suno kisi ka agar arz-e-pak jaana ho
meri taraf sey bhi us zameeN ko ik bosa dena
harey-bharey un darakhtoN sey lipat kar rona
jin ke saaey meiN kabhi mera haseeN bachpan guzra
mileiN jab tumko hawaaeiN to kehna un sey
door anjaan fizaaoN meiN koi tumhaara apna
tumhaari baahoN meiN smit jaaney ko tarasta hey
us maahol meiN aur us ke ehsaas meiN meiN ney
baat karna jahaaN seekha jahaaN haNsna seekha
wahaaN ki galyoN sey milna jahaN pe merey qadam
maaN ki god sey utrey to chalna seekha
wahaaN ki sarrkoN pe nikalna ke jin ke morr sabhi
merey zehan meiN meri soorat sey barrh ke taaza heiN!
Kabhi baaghoN meiN jaana kabhi bazaaroN meiN
kabhi apnoN meiN rehna to kabhi yaaroN meiN
rut koi bhi wahaaN ho sabhi hi piyaari heiN
chahey khizan meiN raho ya raho bahaaroN meiN
Sindh deikhna, Balochistan aur Sarhad bhi
dary-e-Sindh sey milna, nikalna Chanaab ki taraf
saath ley jaana nahi bhoolna tu nigaheiN meri
merey dost tera jaana ho jab Punjab ki taraf!
Arz-e-pak sey kehna meiN us ko bhoola nahi
koi subh-o-shaam usey aaj bhi yaad karta hey
sabz parcham se kehna ke terey rang ki chamak
koi apney dil meiN barri aqeedat sey leeye phirta hey!
By: Amal
